அகவிதைகள்

அலகிலாக் காதல்

2011-10-09T18:14:00.001-04:00

உன் என நினைக்குமுன்னே
உள்ளில் நிகழும் நெகிழ்வையும்
என் எனச் சொல்லுமுன்னே
என்னில் நீ நிறைவதையும்
எனக்கெல்லாம் நீயே என்பதை
எவ்வார்த்தையும் சிக்காதிருந்தும்
யாருஞ் சொல்லாச் சிற்பமாய்
வடித்திடத் துடிக்கிறதென் நெஞ்சு

வயிற்றிலெப்போதும் பறக்கும்
பேசாப் பட்டாம் பூச்சிகளின்
தவிப்பினைத் தூவும் இச்சிறு
வரிகளின் நிழலில் ஆவேசமாயுன்
வருகைக்காகக் காத்திருக்கிறதென்
அலகிலாக் காதல்

இரவுப் பறவை

2011-10-07T17:45:00.001-04:00

அலுமினியப் பறவையில் ஆகாசத்தில் பறக்கையில்
அடியில் கலைந்து கிடக்கின்றன மேகங்கள்
அழுது சிவந்திருக்கும் கீழ்வானத்தைத் தேற்றிவிட்டுத்
தொலைந்த சூரியனைத் தேடும் நட்சத்திரங்கள்
வெட்டியெறிந்த நகம்போல் ஓரமாய்த் தொங்கும் நிலா
விழுந்து சிதறிய வைரக்கற்கள் போன்று
கொத்துக் கொத்தாய் கடந்து போகின்றன ஊர்கள்
சலனமற்றதாய்த் தோன்றும் கடற்பரப்பில்
ஒளிப்பிம்பம் பரப்பி நகரும் கப்பல்கள்
அவசரமாய் கூடுதிரும்புகின்றன நிழற் பறவைகள்
மோனத்தில் நித்திரையில் பயணிகள்
சன்னலூடே விழிகள் வெறித்திருக்க
எண்ணங்களூடே விழித்திருக்கிறது மனம்

அசைவு

2011-09-28T05:17:00.005-04:00

அசைவு

மழை விட்டபின்னும் ஈர கோபுரத்தின்

அசையாச் சிற்பங்களிடையே அசையாதிருக்கிறது

புறா!

***

படித்துறை

2011-08-05T10:13:00.000-04:00

படித்துறைப் பெரும்படிகளும்

பிள்ளையாருக்குக் குடைபிடிக்கும்

ஆலமரமும்

அமைதியாய் நிற்கின்றன

இளமைக் காலத்தில்

நுரை ததும்பி ஓடியிருக்கிறது

அந்த ஆறு

வெங்காயத் தாமரைக்கூட்டம்

ஒய்யாரமாய் மிதந்து செல்ல

வெள்ளத்தில் வீழ்ந்த மரங்களில்

தொத்திச் செல்லும் குரங்குகள்

சித்திராப் பெளர்ணமியன்று

சோற்றுப் பொட்டலங்களுடன்

படித்துறையில் கூடும் ஊரைப்

பார்த்துப் பசியுடன் காயும்

நிலவு

இப்போதெல்லாம் ஊர்ப்பக்கம்

மேகங்கள் வருவதில்லை

மழையும்தான்

ஆற்றுமணல் வீட்டுச் சுவர்களாய்

உருமாறின

ஆறு உருட்டிவந்த பாறைகள்

தலை நீட்டிக்கொண்டிருக்க

வெட்டபட்ட மலைபோல்

கரடுமுரடாய்க் காட்சியளிக்கிறது

ஆறு

கரைகளைக் குறுக்கி ஆற்றின்

கைகளை முறுக்குவதுபோல்

நெருக்கியடிக்கின்றன

வீடுகள்

படித்துறைப் படிகளின்

நீர்க்கறைகளைப் பார்த்துப்

பெருமூச்சு விட்டுக்கொண்டு

கிடக்கின்றன

வயதான ஆலும் அந்த

ஆறும்!

பசி

2011-07-22T12:47:00.003-04:00

வைக்கோலடைத்த கன்று

காற்றிலாடும் வெற்றுத்தூளி

வலிக்கும் மார்புக்குள் வெளியேறாச் சீம்பால்

இரவு நிலா நிசப்தமாக அழ

பசுவுக்கும் மனைவி்க்கும் சொந்தக்காரன்

அவன் பசியில் மட்டும்

கண்ணாயிருக்கிறான்.

மனத் தூரிகை

2011-07-21T19:57:00.000-04:00

உயிரோவியம் நீ - உன்

விழிகளின் கண்ணீர் அழித்து - பின்

இதழ்களில் புன்னகை வரைந்திட

விழைகிறேன் மனத்தூரிகையால்!

மனம்!

2011-07-11T15:39:00.002-04:00

ரொங்கும் பம்பரமும் பறக்கும் தட்டானும்

தரும் சலனமற்றக் காட்சிப்பிழைபோல்

காட்சி தருகிறதென் மனம்!

இயல்புக் கலைப்பு

2011-07-08T18:40:00.001-04:00

அதிவிரைவாய் வந்த கருமேகக்கூட்டம்

கூடாரமாய் விரித்துச் சூழ

இருளடித்து ஓடி மறைந்தது சூரியன்

சடசடவென கண்ணாடியை அறையும்

மழைத்துளிகளைத் துடைத்தெறியும்

நீர்துடைப்பான்கள் படபடக்கச்

சாலைகளில் விரைகின்றன வாகனங்கள்

குடைகள் விரித்தும் கூரைதேடியும்

ஓடுகின்றது ஜனக்கூட்டம்

தூரத்து வானில் ஒளிக்கம்பியாய்

இறங்கித் தழுவிய மின்னலின்

முத்தச்சூடு தாங்காது பற்றியெரிகிறது

தென்னைமரம் - பின் நொடிகள்

தாமதித்துச் செவிகளில் மோதுகிறது

இடியின் ஆவேசம்

சிலகணங்களே நீடித்ததந்த

இயற்கையின் இயல்பு கலைப்பு

யாரோ கையசைத்தாற்போல

சட்டென எல்லாமும் நிற்க

கலைந்து கரைந்தன மேகங்கள்

அவசரமாய் வானவில்லொன்றுடன்

வெளிப்பட்டுச் சிரிக்கிறான் சூரியன்

எதுவும் நடவாதது போல் எல்லாம்

வழமையாகக் காட்சியளிக்க

ஏரிமேல் அலறிப் பறந்து போகின்றது

குழம்பிய வாத்துக் கூட்டமொன்று

சாலையில் மிச்சமிருக்கிறது

மழையின் ஈரம் மட்டும்!

மனத் தனியன்

2011-07-07T17:14:00.000-04:00

இடப்புறம் ஒருக்களித்து இரவோடு

படுத்திருக்கிறேன் தனிமையில்

வலது விழியோரம் நீர் கசிந்து

இடவிழி சேர்ந்து கனக்க

இமை மீறிக் கண்ணீர்

காதை நனைத்துக் கரைய

மனதும் கரைந்தது - ஆனாலும்

கரையாது கல்லாய்ச் சமைந்திருக்கின்றன

சில நினைவுகள் மட்டும்

கண்களைக் கசித்துக்கொண்டு

பிரிவென்னும் நரகத்திலுழல்வது

மகாகவிக்கு மட்டும் நிகழ்வதில்லை

எனக்கும் என் போன்ற சாமான்ய

மனத் தனியர்களெல்லாருக்கும்

***

இன்று மற்றுமொரு நாளே

2010-11-05T09:21:00.001-04:00

சீறிப்பாயும் ராக்கெட்டுகள்
சரவெடிகள் அணுகுண்டு
லஷ்மி வெடி பூச்சட்டி
தரைச்சக்கரம் கம்பிமத்தாப்பு
எண்ணைக் குளியல்கள்
புத்துடைகள் இனிப்புகள் காரங்கள்
வாழையிலை நிரம்பிய விருந்து
தலைதீபாவளி கால்தீபாவளி
நகை நட்டு பட்டுச்சேலை
நாள்முழுவதும் ஊடகங்களில்
நாடாள்வோர் தலைமையில்
நடிக நடிகையர்களின்
களிப்பாட்டங்கள்
இவை எதுவமற்று
இன்று மற்றுமொரு நாளே
என இன்றைய கஞ்சிக்கும்
என்று போல் அல்லாடும்
எளிய மக்களுக்கு
ஒலியற்ற புகையற்ற
உள்ளத்தில் புகைச்சலற்ற
இனிய தீபாவளி வாழ்த்துகள்!

வெறுமை

2010-09-30T13:08:00.002-04:00

உறங்கிய பாட்டி
உறங்கிய பூனை
உட்கார்ந்தாடிய சொந்தங்கள்
சிந்தாது நின்ற நீர்க்குவளை
உந்தித் தள்ளி
பிடரியிலிடித்த குழந்தைகள்
இவை எதுவமற்று
வெறுமனே காற்றில் ஆடுகிறது
ஊஞ்சல்!

உணர்வு

2010-08-14T22:50:00.000-04:00

உலகத்தினுச்சியில் நிற்பதைப் போல்
மேகங்களின் மீது பறப்பதைப் போல்
முடிவிலாது விழுவதைப் போல்
முடிவே இதுதான் என்பதைப் போல்
புதுவாழ்வு துவங்குவதுபோல்
வாழ்வின் அர்த்தம் இதுவென்பதைப் போல்
எல்லாமும் பெற்றதைப்போல்
எல்லாவற்றையும் ஒருசேர
ஒரே முத்தத்தில் உணரவைத்தாயே
கண்ணம்மா!

இலையுதிர் காலம்

2010-08-13T23:53:00.002-04:00

தீப்பிடித்தாற்போலிருக்கின்றன மரங்கள்
சரசரவென்று ஒலியெழுப்பும்
இலைச்சருகுகள் மீது நடக்கையில்
குளிர்ந்து வீசுகிறது காற்று
கழுத்துப்பட்டையை நிமிர்த்திக்
கைகளைச் சட்டைப்பைகளில் திணித்து
இதம் தேடி நடக்கின்றேன்

இலைகள் மொத்தமும் உதிர்ந்து
எலும்புக்கூட்டு மரங்கள்
அசைவற்ற கல்லறைகளாய்
மோன நிலையில் நிற்கின்றன

எப்போதாவது தலைகாட்டும் சூரியனின் கதிர்கள்
இலைகளற்ற மரக்கிளைகளினூடே பாய்ந்து
இன்னும் அதிகமாக வெளிச்சமாக்க
வந்தே வந்துவிடும் பனிக்காலம்

பருத்தி அறுவடைக்காலம்போல
பஞ்சுப் பொதிகளாய் விழும் பனி
மாசுக்களைத் துடைத்தெடுத்து
நிறங்களை மறைத்து எங்கெங்கும்
வெண்போர்வை போர்த்திவிடும் பனி
நீராவியாய் வெளிவரும் மூச்சுக் காற்று

கால்சராய்ப் பட்டிகளையும்
கனத்த காலணிகளையும்
ஏமாற்றி நுழையும் பனித்துளி
உடனுருகி உள்ளங்காலில் சில்லிக்கச்
சட்டென இயற்கைமேல் எழும் கோபம்
அப்பனித்துளி வாழ்ந்த கணமே வாழ்ந்து
இலையுதிர்வது போல மனதிலிருந்து உதிரும்

மனதின் கடந்த சில நினைவுகள் மட்டும்
இலைகள்போலல்லாது உதிர்வதேயில்லை

***

படியில் விழும் வெளிச்சம்

2010-08-13T21:02:00.000-04:00

மூலையில் முடங்கியிருக்கும் என்னுடன்
கால்நீட்டியிருக்கிறது என் கைத்தடியும்
வெளியே வெளிச்சம் கண்கூசுகிறது
தினமும் அதுதான் கண்விழிக்கச் செய்கிறது

வாசற்படி வழியாக நீண்டு ஊர்ந்து விரிந்து

உள்ளே தரையில் விழுந்து கிடக்கும் அது

கைத்தடியைத் தட்டி அதையருகில்
வரச்சொல்லிப் பார்த்திருக்கிறேன்

பதில்சொல்லாது கிடக்கும் வெளிச்சம்

காலம் கரையப் பின்வாங்கிச் சுருங்கி

கதவு நிலையில் நின்று வெளியேறிப்
போய்விடும்

சில நேரங்களில் தவிட்டுக் குருவிகள்

ஜன்னலில் நிழலாக அமர்ந்து

காகங்களின் கரைதலுக்குச்

சிறகு குலுக்கிப் பறந்து போகும்

வெளியுலகின் இயக்கங்கள் தொடர

நானும் என் கைத்தடியும் மூலையில்

என்றாவது வெளிச்சத்தின் கைப்பற்றக்

காத்திருக்கிறோம்

***

உயிர்

2010-07-29T14:19:00.000-04:00

காகங்கள் வரிசையாய் கரைய
மின்கம்பிகளில் தொங்குகிறது
குரங்குக் குட்டியின் உடல்

***

சுமை

2010-04-05T19:03:00.001-04:00

மண்டியிட்டுக் கிடக்கும் வண்டிமுன்
அவிழ்ந்த காளை
சாணக் காலணியோடு வாலாட்டி
ஈக்களை விரட்ட முயல்கிறது
விடுவதாய் இல்லை ஈக்கள்
தானாடாவிட்டாலும் தன் சதை ஆடுகிறது
ஈக்கள் கடிக்குமிடத்தில்

கொம்புகளுக்கிடையே அமர்ந்து
கொத்துகிறது காகமொன்று
காலையில் தின்ற தீவனம் அசைந்து
நுரையாக வழிகிறது வாயோரம்
வண்டிக்காரன் சத்தத்தைக் காணோம்
சத்தம் வாங்கிவரச் சென்றிருப்பானோ

வெயில் வாட்டுகின்றதைப் பொருட்படுத்தாது
வறட்டி தட்டுகிறாள் கிழவி
வண்டி பின்னால் தொங்கி
ஊஞ்சலாடுகிறார்கள் சிறுவர்கள்
ஓரமாய் வண்டியேறக் காத்திருக்கும்
நெல் மூட்டைகளைப்
பளபளக்கும் கருவிழிகளால்
பார்த்துவிட்டு முடியாதென்பதுபோல்
தலையாட்டக் கலகலவென
ஒலிக்கின்றன கழுத்துமணிகள்

தலைப்பாகை கையில் குச்சி வாயில் புகை
மடித்துக்கட்டிய வேட்டியுடன்
வந்துவிட்டான் வண்டிக்காரன்
ஆட்கள் மூட்டைகளையேற்றத் துவங்க
இன்னும் தலையாட்டிக்கொண்டிக்கிறது
மாடு!

***

துடிப்பு

2010-04-03T13:07:00.000-04:00

பத்தாயத்தினுள் பாதி வடையும்
வெளியே பாதி வாலும்
ஆடிக்கொண்டிருக்கின்றன

பாலம்

2010-03-03T22:13:00.000-05:00

நேற்றும் நல்ல மழை பெய்தபோதும்
கற்குவியலும் பாறைகளும்
முற்புதர்களும் நீர்த்தொட்டிகளும்
குழந்தைகளும் ஆண்களும் பெண்களும்
கொடிகளில் வண்ண ஆடைகளும்
கழுதைகளும் நாய்களும் பன்றிகளும்
ஓரிரு லாரிகளும் மாட்டுவண்டிகளும்
மனிதக் கழிவுகளும் குப்பைகளும்
நிரம்பியிருக்க
இடமில்லாமல் நரம்பு போல
சீரற்று கற்றையாய் ஓரமாய்
தங்கித் திணறி ஓடுகிறது
மழைநீர்

போனவருடம்வரை கூட
மணல் நிறைந்திருந்ததைப்
பார்த்த ஞாபகம்

பாலத்திருந்து பார்த்தால்
நதியின் அடையாளங்கள்
எதுவமற்று ஊர் போலவே
காட்சியளிக்கிறது
வைகையூர் என்று பலகை
மாட்டாதது மட்டும் பாக்கி

மேம்பாலத்திற்குக் கீழே
தரைப்பாலமொன்று

சுட்டெரிக்கிறது வெயில்
உச்சியிலும் உள்ளங்காலிலும்
சூடு தகிக்க நடக்கத் துவங்கினேன்
பாலங்களின் கேலிச் சிரிப்புகள்
முதுகில் தகிக்கத் துவங்கின

***

சாலை

2010-02-22T15:26:00.001-05:00

சேவலுக்கு முன்பாக வந்து
தெருமுனையில் நிலைகொண்ட
கலவை இயந்திரத்தின் கூவலில்
விழித்துக்கொண்டது தெரு
வேலையாட்கள் மும்முரமாக
வேடிக்கை பார்த்தது தெரு
வெளியே நின்ற சிறு வாகனங்கள்
வீட்டுக்குள் அலறிப் புகுந்துகொள்ள
பெரிய ஊர்திகள் அடுத்த தெருவுக்குத்
இடம் பெயர்ந்தன
மனித வாகன நடமாட்டமின்றி
வெறிச்சோடியது தெரு

கற்களையும் கருஞ்சாந்தையும் கலந்து

சரளைக் கற்களைப் பரப்பி ஊற்ற
கடமுடவென ஒலியெழுப்பிப்

புகை பரவ வீதியுலா சென்றது

கல்லுருளை வாகனம்

இரைச்சலும் சத்தங்களும்

மாலையில் ஓய்ந்துவிட
வாசல்களை இணைத்து
தெரு நெடுக நீண்டது
அந்தக் கரிய சாலை

திண்ணைப் படியிலமர்ந்து
கற்கள் புதைந்து பளபளத்த
அச்சாலையைப் பார்த்தேன்
இத்தனை நாள் பழகிய
மண்சாலை போயிற்று
இனி
கட்டைவிரல் நகம்பெயராது
கண்ணாடிச் சில்லுகள் குத்தாது
சேறு படாது உடைகளில்
கோவில் தேரிழுப்பதும் சுலபம்
குண்டுகுழிகளற்ற சீரான சாலையில்
வேகமாகச் சைக்கிள் விடலாம்
கிராமம் சீக்கிரமே டவுனாகப் போகிறது
எனக் கற்பனைகள் பரவசமூட்டின

பாதம் குறுகுறுக்கப் பார்த்தால்
கூரையிலிருந்து வரிசையாய்
திண்ணை மூங்கில் தட்டியில்
இறங்கிய பிள்ளையார் எறும்புகள்
தார்ச்சாலை விளிம்பில்
வரிசை கலைந்து குழம்பி நின்றன
வழக்கமாகக் தெருவின் குறுக்காகத்
தாவியோடும் பக்கத்துவீட்டுப்
பூனை படியில் தயங்கியிருக்க
வண்டி பூட்ட இழுத்தால் வராமல்
சண்டித்தனம் செய்து தெருமுனையில்
நின்றது அந்தக் காங்கேயக் காளை

மண்சாலை காணாத மயக்கம் போலும்
நாளாக நாளாகப் பழகிவிடும் எனப்
புன்னகையுடன் எழுந்து திரும்ப
கண்ணில் பட்டது படியோரமாய்
புதைந்திருந்த அந்தக்
காகிதக் கப்பல்!

***

மீன்

2010-02-18T10:02:00.003-05:00

படித்துறையிலிறங்கி நீரில்

கால் மூழ்க நிற்கையில்

பாதம் சூழ்ந்து முத்தமிடும் மீன்கள்

அழுக்கெடுக்கின்றனவாம்

கண்ணாடித் தொட்டிக்குள்

தங்க மீன்களும் வெள்ளி மீன்களும்

வாய்திறந்து நீரைச் சுவாசித்தபடி

வளைய வருகின்றன

தொட்டி பளிச்சென இருக்கிறது

ஓய்வின்றி நீந்தி வரும் மீன்கள்

அழுக்கெடுக்கின்றனவாம்

குதூகலமாய்ச் சுற்றிவரும்

மீன்களிலொன்றை எடுத்து

மனதுக்குள் விட்டாலென்ன!

~~எனத் தோன்றிற்று!~~

***

மாசு

2010-02-14T08:07:00.000-05:00

களத்துமேட்டில் அறுவடை முடிய

குவித்த நெல் அம்பாரத்தின் விளிம்புகளில்

தங்கமாய் மின்னி விழுகிறான் கதிரவன்

ஒற்றை ஆலமரத்தடியின் கயிற்றுக் கட்டில்

முதுகுக்கு இதம்தர

லேசாய் வீசுகின்ற தென்றல்

கண்ணயர்த்துகிறது

காரிருள் போர்வை போர்த்த

கண்ணாடிச் சில்லுகளாய்

மின்னுகின்றன நட்சத்திரங்கள்

விரையும் மேகங்களிடையே

கண்சிமிட்டி எதிர்த்திசையில்

விரைகிறது நிலா

இரவுப் பறவைகளும் வௌவால்களும்

நிழல்களாய் கடக்க

ஊரடங்கி ஒலியடங்கி

இறுதியில் ஒளியடங்க

உடல்வலியடங்க இனிதாய் தூக்கம்

***

அசுரத்தனமாக விஞ்ஞான வேட்டையாடி

இயற்கையை வெல்லத்துடிக்கிறான் மனிதன்

இப்போதெல்லாம் இரவுகள் கண்கூசுகின்றன

மஞ்சள், வெள்ளை பல வண்ணங்களில்

ஊரெங்கும் ஒளிவெள்ளம் நிரம்பித் தளும்ப

களத்துமேடு வெறிச்சோடியிருக்கிறது

ஒளிர்கிறது ஊர்

ஆலமரமும் அதன் விழுதுகளும் என்றோ

வேரறுக்கப்பட்டு அவ்விடத்தில்

அமோக விளைச்சலாகக் கட்டிடங்கள்

மொட்டைமாடியில் இரவுப் படுக்கை

அண்ணாந்து பார்க்க ஆங்காங்கே

சோகையாய் சில நட்சத்திரங்கள்

***

பகலில் ஒலி மாசு இரவில் ஒளி மாசு

எப்போதும் காற்று மாசு என

மனம் முழுதும் மாசுடன்

வேட்டையைத் தொடருகிறான் மனிதன்

***

ஒளியிழந்த வானத்தில்

வழிதவறிவிடும் என பயந்து

மேகங்கள் இப்போதெல்லாம்

ஊர்ப்பக்கம் வருவேதேயில்லை

***

பட்டியல்

2010-02-11T12:01:00.000-05:00

அ-ம்மாவின் அழுகை

ஆ-சை தீர்ந்தபின் எழும் உணர்வு

இ-ருமனம் தரும் மயக்கம்

ஈ-னத் தனங்கள்

உ-ணவின்றி வாடும் வறுமை

ஊ-சிபோல் குத்தும் சொற்கள்

எ-லும்பற்ற புழு அரசுகள்

ஏ-மாற்றும் தலைவர்கள்

ஐ-யம் தரும் சினேகம்

ஒ-ழுக்கம் பற்றிய (மாறும்) விதிமுறைகள்

ஓ-டாத நதிகள்

ஔ-டதங்களில் ஜீவிக்கும் உயிர்

ஃ-க்கன்னாவை மறந்த தமிழன்!

***

கரட்டாண்டி

2010-01-29T04:35:00.002-05:00

சுள்ளென்று கண்கூசும் மதிய வெயில்

இயக்கங்களை முடக்கி கானல்நீராய் ஓட

பட்ட மரக்கிளையொன்றில் அரைக்கண்

நித்திரையிலிருக்கிறது அந்தக் கரட்டாண்டி

கிளை இலைகளின் நிழல் நகர்ந்தபின்னும்

வெயில் உறைக்காது அசைவின்றி
இருக்கிறது கரட்டாண்டி

கரட்டாண்டியாய் பிறந்திருந்தால்

எப்படியிருக்கும் என

அசை போடுகிறது மனது

அவ்வளவாய் பசிக்காதோ?

நிழல் தேடி நகருமுன் சிறு

கல்லெறிந்து பார்த்தேன்
கரட்டாண்டி பயமின்றி இருந்தது

தேவைகள் ஜீவாதாரங்களோடு மட்டும்

நிற்காததால் கரட்டாண்டிபோல்

ஓரிடத்தில் நிற்க முடியாத வாழ்வு

சிங்கம்போல் பிடரி சிலிர்த்து

உறும வேண்டிய வேளைகளில் கூட

கரட்டாண்டியாய் அசைவற்றிருக்க

வேண்டியதாகிவிடுகிறது

முரண்களுடன் ஓடத் தேவையற்ற

கரட்டாண்டி அதிர்ஷ்டசாலிதான்!

***

விலகுதல்

2010-01-27T07:45:00.000-05:00

விலகுதல்களில்லா நாட்களில்லை

முயக்கம் முடிந்ததும் விலகும் இணைகள்

மலை முகடுதொட்டு விலகும் மேகங்கள்

மண்டியிட்டுத் தென்னம்பிள்ளையை

நிலத்திலூன்றி எழுந்து பின்

மண்தட்டி விலகி நின்றது

கைபிடித்து வந்த பிள்ளையை முதல் நாள்

வகுப்பறைக்குள் அனுப்பிவிட்டு விலகி

வாசலில் நிச்சயமற்றுத் தவிப்புடன் காத்திருந்தது

பால்குடிக்கத் துவங்கும்முன்பே இழுபட்டு

காம்புகளிலிருந்து விலக்கப்பட்ட கன்று

காயம் பட்டுச் சாலையில் விழுந்த மனிதனைக்

காணாதது போல விலகிச் செல்லும் மாக்கள்

கழுத்தைப் புண்ணாக்கிய நுகத்தடியிலிருந்து

விடுவிக்கப்பட்டதும் விலகி நிற்கும் காளை

காலத்தேயுதவி செய்யாது விலகிய தோழன்

தோளுக்கு வளர்ந்த பிள்ளைகள் விலகிச் சென்ற நாள்

கால்களையணைத்த குழந்தை மேல்

சினம் காட்டி விலக்கித் தள்ளிய தருணங்கள்

காரணஞ்சொல்லாமலே விலகிய காதலி

மகிழ்வித்த விலகல்களும்

மனமொடித்த விலகல்களுமென

விலகுதல்கள் ஏற்படுத்தும் தாக்கங்கள்

அபாரமானவை

புற விலகுதல்கள் பழகிவிட்டது

புறம் விலக்க அகம் பழகிவிட்டது

ஆனாலும்

சிலநேரங்களில் சில நெருக்கங்கள்

நினைவில் கிளர்ந்து நெஞ்சை எரிக்கையில்

விலகுதல்களில்லா வாழ்க்கைக்கு

மனம் ஏங்கிவிடுகிறது சில கணங்கள்!

***

வேர்

2009-12-11T10:13:00.003-05:00

மண்மேல் நிகழ்ந்த மரணமறியாதிருக்கிறது
சுவர் துளைத்து நீட்டிய வேர்

ஹை(வே)க்கூ

2009-05-09T06:43:00.003-04:00

விரையும் வாகனங்கள் கலைத்த காற்றில்
சாலையில் லேசாக ஆடுகிறது எஞ்சியிருக்கும்
அணிலின் வால்

அதிகாலைக் கனவுகள்

2009-02-13T12:58:00.006-05:00

இரவுகளின் நீண்ட கனவுகளைவிட
அதிகாலைக் கனவுகள் எப்போதும்
என்னை ஆச்சரியப்படுத்துபவை
அவற்றில்தான் நான் கற்பனைகளின்றி
வாழ்வதாகத் தோன்றும்
நனவாக உணரவைக்கும் கனவுகளவை

அவற்றில் நான்
திடீர் பணக்காரனாகிவிடுகிறேன்
பறவையைப் போலப் பறக்கிறேன்
விலையுயர்ந்த வாகனத்தில் பயணிக்கிறேன்
கண்டம் விட்டுக் கண்டம் தாண்டுகிறேன்
காதலியைப் பொது இடத்தில் முத்தமிடுகிறேன்
நினைத்ததை அடுத்த கணமே பெறுகிறேன்
மரணமற்ற வாழ்வைப் பெறுகிறேன்
கடவுளைப் பார்த்துப் புன்னகைக்கிறேன்

ஆனால் அவை சுகங்களை மட்டும்
எப்போதும் தந்துகொண்டிருப்பதில்லை

சில நேரங்களில் அவற்றில் நான்
அதல பாதாளத்தில் அலறி விழுந்திருக்கிறேன்
விபத்துக்குள்ளாகியிருக்கிறேன்
பேரிழப்புகளைச் சந்தித்திருக்கிறேன்
ரத்தசொந்தங்களின் மரணங்களையும் அதன்
வேதனைகளையும் அனுபவித்திருக்கிறேன்
இவ்வளவு ஏன்
நானே என் மரணத்தைப் பார்த்திருக்கிறேன்

இப்படிச் சுகதுக்கங்கள் மாறிமாறி வரும்
அதிகாலைக் கனவுகளில் உணர்வுகள் உந்தப்பட
தூக்கத்தில் சிரிப்பதும்
அழுது அரற்றுவதுமுண்டு
அப்போதெல்லாம் பயந்து எழுப்பும்
மனைவியைப் பார்க்க வெட்கமுற்று
தூங்குவது போல நடிப்பதுமுண்டு

கலைந்துவிட்ட கனவுகளை
நினைவுகளில் ஒன்றுசேர்க்கக்
கண்மூடி அசைபோடும் தருணங்களில்

ஒரு கவிதையைக்கூட எழுதிவிடுவதுண்டு

***

சுதந்திரச் சிறை

2009-02-09T12:01:00.009-05:00

கழுத்துச் சங்கிலியிலிருந்து விடுபட்டதும்
ஜிம்மிக்குத் தலைகால் புரியவில்லை
தாவிக் குதித்து வீடு முழுதும் ஓடியது
உடல் வளைத்துக் கால்களையுரசி
வாலைச் சுழற்றிச் சுற்றி வந்தது - என்
காலணியைக் கவ்வி எம்பிக் குதித்தது

இப்போது அதன் எல்லை திண்ணையோடு
நிற்காமல் வீடு முழுதும் பரந்து விரிந்துவிட்டது
வாசற் கதவில் எழும்பிக் கால்களை வைத்து
வீதியில் போவோர் வருவாரைப் பார்த்துப்
பெருமையாகக் குரைத்தது ஜிம்மி
நான் புன்னகைத்துவிட்டு சாய்வு நாற்காலியிலமர்ந்து
விட்ட இடத்திலிருந்து செய்தித்தாளைத் தொடர்ந்தேன்
சுதந்திரம்தான் ஒரு ஜீவனுக்கு எத்தகைய
உற்சாகத்தைத் தந்துவிடுகிறது!

கழுத்துச் சலங்கைகள் கலகலக்க
கடந்து போனது மாட்டு வண்டியொன்று
பின்னே குழந்தைகள் நிரம்பிய
ரிக்‌ஷாவும் ஒரு ஆட்டோவும் தொடர
கதவில் கட்டிய பையில் பால்காரன்
பாக்கெட்டுகளைப் போட்டுவிட்டுப் போனான்
ஜிம்மியின் வாலாட்டமும் குரைப்பும் நிற்கவேயில்லை

எதிர்வீட்டு முன் விளக்குக் கம்பத்தில் தோன்றியது
அந்தக் கரிய தெருநாய்
கழுத்துப்பட்டை எதுவுமில்லா முகவரியற்ற
நாய் அது
காலைத் தூக்கிக் கம்பத்தில் சிறுநீர் கழித்தது
ஓரமாய்க் கிடந்த வாழையிலையைப் பிரித்து
முகர்ந்து லேசாக நக்கியது - பின்பு
விறுவிறுவென்று என் வீட்டை நோக்கி வந்தது

ஜிம்மியைக் கண்டதும் ஒருமுறை திடுக்கிட்டது அது
ஜிம்மியும் அதுவும் முகர்ந்துகொண்டன - பின்பு
அது பின்னகர்ந்து எங்கோ ஓடிப் போனது

சமீபத்திய கொண்டாட்டத்தை நிறுத்தி
ஜிம்மி மெதுவாக உள்ளே நடந்துவந்தது
என் காலடியில் நின்றது - ஒருமுறை
தன்னைச் சுற்றிவிட்டு அமர்ந்து
முன்னங்கால்களின் மீது தலையைச்
சாய்த்துக்கொண்டது
வீட்டினுள் மௌனம் நிரம்பியிருக்க
என் விழிகள் வாசிப்பைத் தொடர்ந்தன

***

மாற்றம்

2009-01-30T14:50:00.002-05:00

நாள்தோறும் சென்று வரும் அதேசாலைதான்
அவ்வப்போது செப்பனிடப்பட்டு விரிவாக்கப்பட்டு
அதன் தோற்றம் மாறிக்கொண்டேயிருக்கிறது
போக்குவரத்து விளக்குகள் நிறம் மாறுகின்றன
வாகனங்கள் நிற்கின்றன, நகர்கின்றன, விரைகின்றன
இரு சக்கர வாகனங்கள் ஊடறுத்துச் செல்கின்றன
எப்போதாவது சில மிதிவண்டிகளும்கூட
நடைபாதையில் பாதசாரிகள் விரைகிறார்கள்
கடைகளுள் நுழைந்து வெளிவருகிறார்கள்
வியாபாரம் நடக்கிறது, மந்தமாகிறது, பரபரப்படைகிறது
மழை, பனி, வெயில் என்று வானிலை
மாறிக்கொண்டேயிருக்கிறது தினமும்
மூலையில் மெதுவாக எழும்புகின்றது
புதிய கட்டிடமொன்று
காட்சிகள் மாறிக்கொண்டேயிருக்கின்றன
கழுத்தில் அட்டையுடன் கையேந்தி
இருளடைந்த முகத்துடனிருக்கும் அந்த
உறையுளற்ற பெயரற்ற மனிதனைத் தவிர

***

பின்னிரவில் வெள்ளி நிலா

2009-01-28T14:32:00.007-05:00

பின்னிரவில் கண்விழித்தெழுந்தேன்
முற்றத்து வெளிச்சம் தாண்டிச் செல்ல
கொல்லையில் உரல் நீரில்
நெளிகின்றது வெண்ணிலவு
ஓசையற்ற வான்வெளியில்
கண்சிமிட்டுகின்றன நட்சத்திரங்கள்
தொடுவானின் சோகை வெளிச்சத்தின்கீழ்
இருள் சூழ்ந்து உறங்குகிறது உலகம்

மனதுக்குள் சதா நிரம்பியிருந்து
புன்னகையுடனும் சிரிக்கும் கண்களுமாக
என்னைப் பார்க்கிறது அவள் முகம்
போர்த்தியிருந்த குளிர் இன்னும்
இறுக்கியணைக்க கதகதப்பூட்டுகிறது
அவளின் இனிய நினைவுகள்

எப்படி அவளிடம் காதல்வயப்பட்டேன்
என்று என்னிடம் நேற்று கேட்டாள்
மௌனத்தை விடையாகத் தந்துவிட்டு
இப்போது நிலவில் அவளைக்
காட்சியாக்கிப் பார்த்துக்கொண்டிருக்கிறேன்
அவளைப் பார்த்த தருணத்திலிருந்து
என்னை நானே கேட்டுக்கொண்டிருக்கும்
கேள்வி அதுவென்று அவளறிவாளா?
யாரும் பார்த்தறியா உள்ளத்தில்
உலகளவு நிரம்பியிருக்கும் காதலுக்குக்
காரணம் கேட்டால் எப்படி பதிலிறுப்பது?

இருப்பவை நிகழ்பவை அனைத்துக்கும்
காரணங்கள் சொல்ல முடியுமென்றால்
மனிதன் கடவுளாகிவிடுவானே
நான் கடவுள் அல்ல!
கடல் போன்ற மனதில் கிளர்ந்து தோன்றும்
பிரபஞ்ச அளவு உணர்வுகளைச்
சில ஆயிரம் வார்த்தைகளே இருக்கும்
மொழிகளில் விவரிக்க இயலுமா?

முழுமையற்றது என் பதில்
என்பதை நானறிவேன்
நானறிந்த மொழிகளில்
இவ்வளவே சொல்ல முடிகிறது

நிலா! நில்! கேலிப் புன்னகை போதும்.
என்னால் ஓராயிரம் வார்த்தைகளில்
சொல்ல முடியாததை ஓரணைப்பில்
அவளுக்கு உணர்த்த முடியும் என்பதை
இப்போதும் உறங்காமல் தவித்திருக்கும்
அவளிடம் சென்று சொல்லேன்!

***

ஹேப்பி நியூ இயர்

2009-01-02T17:27:00.005-05:00

ஜனவரி ஃபர்ஸ்ட் அன்னிக்கும்
ஏப்ரல் ஃபோர்ட்டீன்த்தன்னிக்கும்
”ஹேப்பி நியூஇயர்” என்று
உற்சாக பானத்தை உள்ளே செலுத்தி
ஊர் முழுதும் ஓடியாடி
அலறிக் கொண்டாடுகிறான்
தமிழன்

புத்தாடை வாங்கியணிகிறான்
பெண்கள் பட்டுப்புடவையும்
நகைகளும் கடனும் வாங்கி
பீரோவில் பூட்டிக்கொள்கிறார்கள்

ஆங்கிலப் புத்தாண்டு
தமிழ்ப் புத்தாண்டு
கன்னட, தெலுங்குவருடப்
பிறப்போடு சேர்த்து
இப்போதெல்லாம்
சீனப் புத்தாண்டுக்கும்கூட
கோவிலுக்குப் போகிறான்
பிள்ளையாரைக் கும்பிட்டு
உக்கி போடுகிறான்
எல்லாருக்கும் மின்னஞ்சல்
வாழ்த்து அனுப்புகிறான்

நாள்பூரா தொலைக்காட்சியில்
நடிகர் நடிகைகளைப் பார்த்துவிட்டு
நன்றாக உண்டு உறங்குகிறான்
புத்தம் புதிய படங்களுக்கு
இரண்டாமாட்டம் நண்பர்களுடன்
போகிறான்
சிவந்த கண்களுடன் எழுந்து
மறுநாள் அலுவலகத்தில் சந்திப்பவர்களிடம்
”ஹவ்வாஸ் த பார்ட்டி?” என்று
குசலம் விசாரிக்கிறான்

இப்படித் தமிழரெல்லாரும் இன்புற்றிருக்க
மூலையில் கேட்பாரின்றிக் கிடக்கிறது
தமிழ் மட்டும்.

***

உயிர்மெய்

2008-12-29T15:13:00.006-05:00

கருங்கூந்தல் அலையாய் இறங்க
கன்னக்கதுப்பு பளபளக்கிறது
மின்னும் கண்களில் சிரிப்பு
மிருதுவான நெற்றி மென்மையாய்
கேட்கிறது ஓர் ஈர முத்தத்தினை
தொடச் சிவக்கிறது காது மடல்கள்
கச்சிதமாய் மூக்கின் கீழ்
கவ்வச் சொல்லும் இதழ்கள்
கழுத்தில் துவங்கி இடையில்
முடியும் அபாய வளைவுகள்
*
என் வார்த்தைக் கையிருப்பு
இவ்வளவேயானாலும்
எனக்குத் தெரியும்.
மொழியின் எல்லைகள் தொட்ட
புலவர்கள் முயன்றாலும் கூட
கடலளவு வார்த்தைகளைத்
தொடுத்து வர்ணித்தாலும்
திருப்தியின்மையை மட்டும்
தரும் உன் அபார அழகு என
*
வார்த்தைகள் நேர விரயமென
விரைந்துனை நெருங்கியணைக்கிறேன்
ஓரணைப்பில் உலகம் மறக்கிறேன் - உன்
ஒரு முத்தத்தில் மொத்தமும் உணர்கிறேன்
முத்தமா அது?
ஆழ்கடலில் முத்தெடுக்கும் உத்வேகத்தில்
உடலெங்கும் மின்சாரம் ஓடச் செய்யும்
பரவச இழைப் பின்னல் அது
*
சர்ப்பங்களாய் இழைந்து இணைந்து
முயங்கும் அம்மணித்துளிகளில்
மெய்மறந்து அசையாதிருக்கிறது காலம்
கடிகாரம் நின்ற அவ்விடைவெளியில்
உயிர்மெய்யிரண்டும் கலக்கும்
இடைவெளியற்ற அவ்வியக்கத்தைத்
தொடரத் துடிக்கின்றன மனங்கள்

***

ஒற்றை நிலா

2008-12-24T16:40:00.004-05:00

முழுநிலா ஒளிர இருளில் நிழலாகச்
சத்தமின்றிப் பறக்கின்றன வவ்வால்கள்
ஆடாதிருக்கின்றன மரங்கள்
வைரக் கண்களுடன் மாமரப் பொந்தில்
அமர்ந்திருக்கிறது ஆந்தை
மண்வெளிகள் சலனமற்றிருக்கப்
புதர்களுக்கிடையே ஓடுகிறது நரி
மெதுவாய் அடிவைத்துப் பாய்ந்து கவ்விய
எலியுடன் தாவி மறைகிறது கரும்பூனை
தாமதமாக கூடு திரும்பும் பறவைக் கூட்டம்
மயானத்திலிருந்து மெல்லியதாய்
உயர்ந்தெழும்புகிறது புகை
என் காலடியைப் பற்றிக்கொண்டு
கூட வருகிறது நிழல்

ஒற்றைகளாய் நானும் உயரே நிலாவும்
ஊருறங்கும் நடுநிசியில் திக்கற்று
நடக்கின்றோம் மௌனமாக

***

வேட்டையாளன்

2008-11-21T20:20:00.000-05:00

ஓங்கரித்து அழுததில்லை எதற்கும் -
இன்றுவரை

இறந்த கால மரணங்களுக்கும்
விலகிக் கரைந்த காதலுக்கும்
உயிர்த் தோழனின் துரோகம்
தந்த வலிக்கும்
வயதாகாது நிற்காது ஓடியென்னை
வயதாக்கிப் பின்தள்ளும் காலத்திற்கும்
நெஞ்சினுள் பந்து போல் கண்களில்
நீர் உறைபனியாய் நின்றதோடு சரி

எதிர்பாரா தருணங்களில் எனைச்சுற்றி
இலையுதிர்கால மரங்களைப் போல
விழுந்துகொண்டேயிருக்கின்றன சோகங்கள்
அப்போதும் வாய் பேசாது நிற்கையில்
மரமாகிப் போனேனோவென நினைத்ததுண்டு
மரங்களின் சுரணையற்ற தோல் போலத்
தடித்து மரத்துப் போனதோ மனமெனக்
குழம்பியதுண்டு

எதிர்பாராமல்தான் விடிகின்றன
ஒவ்வொரு பகலும்

இலைகளிழந்து நிர்வாணமாய்
நிற்கின்றன மரங்கள்
குளிர்காலக் கொடும்பனிப்பொழிவுகள்
நித்தமும் தொடர்கின்றன
இயற்கை செயற்கை எல்லாவற்றையும்
வஞ்ச(க)மில்லாது மூடிவிடுகிறது பனி
அது மனிதர் மனவழுக்குகளையும்
மூடிவிட்டால் எவ்வளவு நன்றாகவிருக்கும்?

கைத்தடி துணைவர காலை நடத்தலைத்
துவக்கித் தெருக் கோடியில் திரும்புகையில்
சாலையோர வெண்பனியில் துருத்தியிருந்தது அது
அருகில் நெருங்கிப் பார்த்தால்
அசைவற்றுத் தென்பட்டன மென்பாதம்

மண்டியிட்டு நடுங்கும் விரல்களால்
பனிவிலக்கிப் பார்க்க கண்மூடிப்
புன்சிரித்து மல்லாந்திருந்தது
எதிர்வீட்டின் முகவரியோடு
என் வீட்டில் எப்போதுமிருக்கும்
அந்தச் சாம்பல்நிறப் பூனை

கடைசிச் சிநேகிதமும் போயிற்று
அத்தருணத்தில் அச்சாலை விளிம்பு
வாழ்க்கையின் விளிம்பாகத் தோன்றியது

வழமையான இரவு உலாவில்
வேட்டையாடப்பட்டுப் போயிருக்கிறது
பூனையின் உயிர்
வேட்டையாளன் யாரெனத் தெரியவில்லை

ஒன்றுமட்டும் நிச்சயம் அவன்
ஓங்கரித்து அழுதிருக்கமாட்டான் எதற்கும் -
இன்றுவரை

ஒருவேளை
நானும் வேட்டையாளனோ?

***

இடம் காலம் மாற்றம்

2008-11-21T09:29:00.000-05:00

மரத்தின் கடைசி இலையும் உதிர்ந்தாகிவிட்டது
இப்போது பறவைக்கூடுகளோடு மரம் பின் மறைந்திருந்த
வீடுகளும் வாகனங்களும் தெரிகின்றன
சோம்பேறிச் சூரியன் சீக்கிரமே ஓடிவிடுகிறான்
குளிர் ஊடுருவிக் குத்துகிறது விலாவை
ஏரி உறைந்திட வீட்டினுள் எண்ணையும் உறைந்தது
கலைந்த படுக்கையில் போர்வைக் குவியலை
விலக்க மனமில்லாது கண்மூடி விழித்திருக்க
துவங்கும் நாளை எதிர்நோக்கவேண்டிய கட்டாயத்தில்
உடலைத் எழத் தூண்டித் துரத்துகிறது மனம்

சாலையில் மந்தமாக வாகனங்கள் நகர
அடுக்கு உடைகளில் நீராவி மூச்சு விட்டு
சோம்பி நடக்கிறார்கள் ஜனங்கள்
காகங்கள் எதற்கோ கரைகின்றன - வாத்துகள்
ஏரியை நோக்கி எழும்பிப் பறக்கின்றன

மாற்றங்கள் சுழன்றடிக்கும் வெளியுலகிலிருந்து
சுடுங்காற்று உலவும் அலுவல அறைக்குள் புகுந்து
கம்பளியாடை துறந்து இருக்கையில் அமர
மாற்றமில்லா அலுவல்களைப் பற்றிப் பிடித்து
அன்றைய பொழுது நகரத் துவங்குகிறது
இன்றும் மற்றுமொரு நாளாக.

மனம் விட்டு, வாய்விட்டு

2008-11-21T06:05:00.000-05:00

முதற் கைக்கடிகாரம், முதல் ஜோடிக் காலணிகள், முதல் திரைப்படம்,
முதல் புகைப்படம், முதல் மழை நனைதல், முதல் நீச்சல்,
முதல் சைக்கிள், முதல் வீடு, முதல் திருட்டு,
முதல் வெற்றி, முதல் வேலை, முதல் சம்பளம்
முதல் நண்பன், முதற் கடிதம், முதற் பாராட்டு,
முதல் ரயில், முதல் வான் பயணம், முதல் வாகனம்,
முதற் காதலி முதல் தொடுகை, முதல் முத்தம்
முதலிரவு, முதலுறவு, முதற் குழந்தை
முதல் வீடு, முதன்முறையாய் முதலாளியாய் - என
முப்பது வயதுகளில் முப்பது தருணங்களைப்
புன்னகைக்க வைத்தக் காரணங்களாய்
சுலபமாகச் சொல்ல முடிகிறது - ஆனாலும்

மனம்விட்டு, வாய்விட்டுச் சிரித்த தருணங்கள்
எவையென்று யோசித்தால் ஓரிரண்டைத் தவிர
வேறெதுவும் குறிப்பிட முடியாதிருக்கிறது

காரணங்கள் அருகிய கடந்த காலத்தைத்
திரும்பிப் பார்க்கையில் சில நேரம்
புன்னகைக்கக்கூட முடிவதில்லை

****

மனம் மொழி தூரம்

2008-11-14T13:39:00.001-05:00

தொலைதூரத்தில் தனித்திருக்கிறது அவள் மனம்
துன்பங்களில் உழன்றிட ஆதரவு தேடுகிறது
தொலைந்திட்ட என் இதயத்தைத் தேடியலைகையில்
தென்பட்டது அவள் முகம் - அது
நிரந்தரமாயிற்று என் சிந்தையில்

தூரம் தள்ளி வைத்திருந்தாலும் - அவள்
துடித்திடும் இதயத்தைக் கேட்க முடிகிறது - ஆனாலும்
அவளின் துன்பமென்னவென்றறியாது தவிக்கிறேன்
நான் நட்பா, எதிரியா - அவளின் துன்பங்களில் ஒன்றா
எனக்கூட அறிய வகையில்லாது துடிக்கிறேன்

உணர்வுகள் புரிபடாத வார்த்தைப் பரிமாற்றங்கள்
ஆயாசத்தைத் தருகின்றன - அவளிடம்
பட்டெனச் சொல்லிவிட உதடுகள் துடித்தாலும்
வெடித்துச் சிதறும் என் வார்த்தைகளின் சுயநலத்தில்
அவளை இழந்துவிடக்கூடிய அச்சம் என்னை வாட்டுகிறது

எதுவுமில்லாவிட்டாலும் இப்போதைய எங்களின்
சம்பிரதாய வார்த்தைகளும் உரையாடல்களும்
அவை வெற்றாகவே இருந்தாலும்கூட - அவை
நட்புச் சங்கிலியாக எம்மைப் பிணைப்பது போதும்
மனங்கள் தொடர்ந்து துடிக்கட்டும்

என்றாவதொரு நாள் உணர்வு மொழிகளின் விளிம்பில்
அர்த்தமற்ற வார்த்தைகள் உடைந்து போக
மடைதிறந்து சங்கமிக்கும் மனங்களின் நேசத்தில்
இன்றைய தற்காலிக துடிப்புகள் கரைந்து போகும்

நம்பிக்கைதானே வாழ்க்கை?

***

வாய்விட்டழுது

2008-09-17T19:39:00.000-04:00

வாய்விட்டழுது பல வருடங்களாகின்றன
அழுகையில் என்ன சுகம்? ஆனால்
அழாமலிருக்கும் வாழ்க்கை
சிலநேரங்களில் வேதனையாக இருக்கிறது

துக்கம் தொண்டையடைத்த தருணங்கள் உண்டு
கால்கள் நழுவிப்போன நிகழ்வுகள் உண்டு
சட்டென்று முகம் திருப்பி
விழிநீரைத் தேக்கியதும் உண்டு
அப்போதெல்லாமும் வாய்விட்டழுததில்லை

எது என்னைத் தடுக்கிறதென்று புரியவிடாமல்
எள்ளிநகையாடுகிறது மனக்குரங்கு
இப்போதைய துக்கத்திற்கு வாய்விட்டழவேண்டும்
ஆனால் இன்னும் அழ முடியவில்லை
உண்மையைச் சொன்னால் உறக்கம் வருகிறது

இரவுக் கனவுகள் பனியாய் இறங்குகையில்
இருட்டுப் போர்வையைப் போர்த்தி
அவற்றைத் துரத்துகிறேன்
விடியலில் கனவுகளின் மிச்சங்களிருப்பதில்லை
உறக்கம் கலைந்து விழித்திருந்த இரவுகளில்
உலகின் நிசப்தத்தில் ஆழ்ந்து லயித்திருக்கிறேன்

என்னிடம் ஒரு திட்டமுண்டு
தொலை தூரத்தில் தெரிகிறதே அக்குன்று
சிவந்து, கருத்து, ஒளிர்ந்து, இருண்டு
என்று உணர்வுகள் தளும்பக்
குவியலாக நிற்கிறது அது

ஞாயிறன்று ஞாயிறு எழுமுன்
அங்கு சென்றுவிடவேண்டும்
குன்றின் மீதேறி உச்சியடைந்ததும்
உலகத்தை அங்கிருந்து பார்க்கவேண்டும்
சிறுமதி படைத்த மனிதரெல்லாம்
சிறிதாகத் தெரிவதை ரசிக்கவேண்டும்
ஓங்கிக் குரலெடுத்து அழுதுகொண்டு
ஒற்றை வரிக் கவிதை போலச் செல்லும்
ஒய்யார ரயிலைப் பார்வையிலிருந்து
மறையும்வரைத் தொடரவேண்டும்
நாள் கரைந்து கூடு திரும்பும்
பறவைக்கூட்டத்தைப் பார்க்கவேண்டும்

அந்திப் போர்வை குன்றைத் தொடும்போது
தொலைந்த வெளிச்சத்தைத்
தேடிவரும் இருள்
உச்சியில் தனித்திருக்கும் பாறைமீதேறி
தனிமையில் தனியனாக
ஆரவாரங்கள் அடங்கக் காத்திருந்து
யாரும் பார்க்காத கேட்காத அவ்விடத்தில்
முன்பின் மறைப்புகளன்றி பரந்து விரிந்த
நிர்வாணப் பிரபஞ்சத்தைப் பார்த்துப் பின்
விண்ணோக்கி விழிகள் மூடி
வாழ்வில் சேர்ந்துவிட்ட துக்கங்களையெல்லாம்
அடிமனதிலிருந்து எக்கிக் கிளறி
நிலைகுத்திய காற்றை அசைக்கும்வண்ணம்
பெருங்குரலெடுத்து அழவேண்டும்
மூச்சு தீரும்வரை, துக்கம் வற்றும் வரை.

காற்றில் கரைந்துபோகட்டும் என்னழுகை
விடியலின் வேதனை வெளிச்சம்
வாழ்வில் பரவும் மற்றுமொருநாளை
நான் எதிர்நோக்க வேண்டியிருக்கிறது
பழைய நாட்களின் மரணம்
நினைவுக் கிணற்றில் படிமமாகிவிட்டது

இக்குன்று மட்டும் இல்லாதிருந்தால்
என்ன செய்வேன் என்று யோசித்ததில்
துக்கம் தொண்டையை அடைக்கிறது - ஆனால்
வாய்விட்டழத்தான் முடியவில்லை!

***

மணம்

2008-09-16T23:06:00.000-04:00

தொடர்ந்து முழங்கும் குண்டுகளால்
அதிர்கின்றன நெஞ்சுக்கூடுகள்
பற்கள் அரைபட இறுகிய தாடை
இமைகளைப் பிரிக்கிறது நீர்க்கோடு
வெடித்துக் கிளம்பும் விம்மல்கள்
விழி வழியாய் வெள்ளமென உணர்வுகள்
வெடித்திடத் துடிக்கின்றன இதயங்கள்

சூன்யம் நிரம்பித் ததும்புகிறது வீடு
அந்தியிருள் சூழ்ந்து வர வெளிச்சமின்றி
இருண்டிருக்கின்றன உயிரற்ற விளக்குகள்

ஒட்டடை போர்த்திய நடைவண்டி பரணில்
தூசி படிந்த அறையில் அசைவற்ற தூளி்
ஒலியெழுப்ப அஞ்சியுறங்கும் கொலுசு
ஓரமாய் கிடக்கும் விளையாட்டுச் சாமான்கள்
மழலையும் கொலுசுச் சத்தமும் ஓய்ந்து
மயானமாய் காட்சியளிக்கிறது வீடு

துணிசுருட்டித் தூக்கிய கரங்களிலிருந்து
எழும்பிப் பரவித் தொட்டுலுக்குகிறது உயிரை
அக்குழந்தையின் மணம் இன்னும்

****

என் காதலும் அதற்கான கவிதையும்

2008-09-12T17:35:00.000-04:00

ஏய்! என்னது காதல் கவிதை எழுதணுமா?

எனக்குக் காதல் கவிதைன்னாலே புடிக்காது
ஒருவேளை எழுத வராதுங்கறதால
ச்சீ இந்தப் பழம் புளிக்கும்னு
அப்படிச் சொல்றேனோ??

Well, உனக்கு நினைவிருக்கா?
First Meet பண்ணப்போ ரெண்டே second-ல
I fell in love with you!
But I'm still wondering
why I took the 2nd second!

எந்தப் பெண்ணிலும் இல்லாத ஒன்று
ஏதோ உன்னிடம் இருக்கிறதுன்னு
பாலு பாட்டை எத்தனை தடவை
கேட்ருப்பேன்? பாடிருப்பேன்?

அது என்னன்னு இன்னிக்கு வரைக்கும் தெரிலைடி

என்னடீ மாயம் செஞ்சே!
அது உன்னோட smile-ஆ?
உன் husky voice-ஆ?
நவாப்பழக் கண்களா? இல்லே
கடிச்சிடலாம்னு தோண்ற உதடுகளா?
இல்ல கழுத்... ஏய்.. அடிக்காதே

Let me try this!

----

மழை பெய்த நாட்களில்
அரவமற்ற தெருக்களில்
விரைந்திட்ட வாகனத்தில்
செல்கையில் நீயென் கழுத்தில்
முத்தமிட்டென்னை மயிர்
கூச்செறியச் செய்த கணங்கள்
மனக் கோவிலின் கல்வெட்டுகளாய்
நிற்கின்றன இன்றும்

இடையணைத்த பயணத்தில் உயிரைக்
கதகதப்பாக்கினாய்
ஆடைமாற்றிடப் பொறுமை காத்துப் பின்
அருகில் நெருங்கினாய்
உடன் துவங்கிய முடிவிலா
முத்தங்களில்
உயிர்த் தேடலைத் தொடர,
கதவு தட்டத் தயங்கி வெளியில்
காத்திருந்தது இரவு - இரவு முழுவதும்.

எத்தனை இரவுகளை
நாம் காக்கச் செய்தோம்!

நரை படர்ந்த பின்னும் இளமையாகத்
தொடருகிறது நம் காதல்
நாமிருக்கும்வரை மட்டுமல்ல
நமக்குப் பின்னும் அது தொடரட்டும்

----

ஆச்சா... இதுக்கு மேல முடியாதுப்பா
என்னோட காதல் பத்தி இனிமே
கவிதையா எழுதச் சொல்லாதே
எனக்குத் தலைவர் கமல் சொன்னதுதான்
ரொம்பப் பிடிக்கும் - என்னவா?
சாத்தியம் என்பது சொல் அல்ல செயல்!

செயல்லயே காட்டிடறேனே ப்ளீஸ்!
என் கிட்டக்க வாயேன்!

****

காணி நிலம்

2008-09-10T15:10:00.000-04:00

ஒசந்து கெடந்த தென்னை, பனையைக் காங்கலை
மாமர, வாழைத் தோப்புகளையும் காங்கலை
கரும்பு, கம்பங் காடுகளையும் காங்கலை
ரெண்டு பக்கமும் பச்சைக்கம்பளமா விரிஞ்ச
நஞ்சை, புஞ்சைகளையும் காங்கலை
வரப்புகளைக் காங்கலை ஓடின
வாய்க்காலுங்களையும் காங்கலை
எல்லாமே 60 x 40 துண்டுகளா மாறிப் போச்சுது
நாலு மூலைல வெள்ளைக் கல்லுங்க - பூமித்
தாயோட கல்லறை மாதிரி தோணுதுங்க
மயானமாச்சுது பூமி
மாறிப் போச்சுது மண்ணு
அவ கண்ணீர் விட்டு அழுது அழுது
வத்திப் போச்சுது தண்ணியும்
பூமித் தாயைச் செரச்சுப் போட்டு
மூதியாக்குற மேதாவி ஜனங்க
நெல்லு வெளைஞ்ச பூமில
வீடுங்க வெளையுது இன்னிக்கு
இப்படியே போனா நாளை பசிக்குச்
செங்கலைத்தான் திங்கணும் போல
'காணி நிலம் வேண்டும்'னத ஒருவேளை
தப்பாப் புரிஞ்சிக்கிட்டோமோ?

***

இது ஒரு பனி மாலைப் பொழுது

2007-02-14T19:10:00.000-05:00

வெண்மணல் போலப் பொழிகிறது வெண்பனி
மின்கம்பி மீது உறக்க நிலையில் கருங்காகம்
அந்திப் பொழுதில் சிவந்த கீழ்வானம்
கண்சிமிட்டத் துவங்கின மின்விளக்குகள்
சாலைகளில் சேறுபோலப் பனி
மந்தமாய் நகரும் வாகனங்கள்
தொழிற்சாலைப் புகை சத்தமில்லாது எழ
எந்திரங்கள் இரைச்சலாய் இயங்கின உள்ளே
பிரமித்து உறைந்திருக்கும் ஏரியின் மீது
நடைபோடுகின்றன வாத்துகள்
கொக்குகள் கால் தூக்காது காத்திருந்தன
பனிக்கட்டியின் கீழ் நீந்தும் மீன்களுக்காக
உடல் முழுதும் உடை மூடி
தூண்டிலுடன் காத்திருக்கிறார் முதியவர்
மெதுவாய் காட்சிகளைக் கடந்து செல்கையில்
ஊரில் இந்நேரம் விடிந்திருக்குமாவென்றும்
மார்கழிக் குளிர் துவங்கியிருக்குமாவென்றும்
உள்ளே ஓடின யோசனைகள்
வீட்டை இருள் போர்வை சூழத்துவங்க
இலையற்ற மரங்களில் ஆரவாரம் அடங்கி
லேசாய் பயமுறுத்துகிறது நிசப்தம்
பனித்தொப்பி போட்டிருக்கிறது தபால்பெட்டி

இன்றும் கடிதம் வரவில்லை.

***

கூரை

2007-01-25T20:55:00.000-05:00

நேற்றிரவு மழையில்
கூரை நனைந்து
வீடு முழுதும் வீசுகிறது
உயிர்க்கத் துடிக்கும்
தென்னையின் வாசம்

ஓட்டைகளூடே வீட்டினுள்
விழுந்த மழைநீரைச்
சேமித்த கலசங்களில்
நீர் நிரம்பியிருக்கிறது
கூரையின் நிறத்தில்

தெருவில் நின்று பார்க்க
பக்கத்து மச்சுவீட்டிலிருந்து
குதித்தோடுகிறது பூனை
அதுவரை அமர்ந்திருந்த
காகம் பறந்தோட
கூரையில் நழுவி
சிக்கி நிற்கிறது மீன் கூடு

தெருப்பையன்கள் அடித்த பந்து
மேலிருந்து உருண்டு வர
கைகளை ஏந்திப் பிடிக்கத்
தயாராய் நின்றவனை ஏமாற்றி
நடுவில் அமர்ந்துகொண்டது
பொல்லாத அந்தப் பந்து
சேலை காயப்போடும் கழிகொண்டு
கூரையை அடித்து மிரட்டி
பந்தைத் திரும்பப் பெற்றாகிவிட்டது

மழைவெயிலிலிருந்து கழிவரை
நிறையத் தாங்கிவிட்டது கூரை
முதுமையில் மக்கி இப்போதெல்லாம்
மழை பெய்தால் ஒழுகுகிறது

வீட்டினுள் வயதான ஓலைகளின்
இறுதி மூசசாய் மெல்ல
வீசுகிறது காற்று

அடுக்கடுக்காய் கிடுகுகள்
நிமிர்த்திப் பார்க்கையில்
நெளிகின்றன கரையான்கள்

நமத்துக் கிடக்கிறது
ஏதோவொரு தீபாவளி இரவில்
பறந்து விழுந்த பட்டாசொன்று

ஆட்களும் புத்தம்புது கிடுகுக் கட்டுகளும்
மாட்டுவண்டியில் வந்தாகிவிட்டன

அவர்கள் கூரையில் பரவி
கீற்று ஒவ்வொன்றையும்
பிரிக்கிறார்கள்
வலிதாளாதோ என்னவோ
மூங்கில் சட்டங்கள் முனகுகின்றன
மொத்தமும் பிரிக்கப்பட்டு
கூடு மட்டும் மிஞ்ச
வீட்டினுள் இவ்வளவு வெளிச்சத்தைப்
பார்த்ததேயில்லை!

மூலைகளின் ஒட்டடையில்
சிலந்திகள் பயந்து அலைகின்றன
மரப்பல்லியொன்று விரைந்தோடி ஒளிகிறது

தேய்ந்த மூங்கில்கள் உருவப்பட்டு
புதியவை கட்டப்பட்டன
புதுக் கிடுகுககட்டுகளைப் பிரித்துச்
சீராய் மேய்கிறார்கள்
இறுக்கமாய் முடிகிறார்கள்
வீட்டினுள் வெளிச்சம் குறைந்துவர
இறுதியில் மின்விளக்குகள்
எரியத் துவங்குகின்றன

எல்லாம் முடிந்து
தெருவில் இரைந்துகிடந்தன
கூரைச்சருகுகளும் உடைந்த
மூங்கில்களும்
மொத்தமும் அள்ளப்பட்டு
கொல்லைப்புறத்திற்குக்
கொண்டுபோகப்பட்டன
வெந்நீர் அடுப்புக்கு விறகாக்க

புது வாசனையுடன் கூரை
பளிச்சென இளமையாய்
நிழலளித்துக் கொண்டிருக்கிறது

திண்ணையிலிருக்கும் பெற்றவர்களுக்கும்
வளையவரும் புது மருமகளுக்கும்

***

பி.கு. கடைசிப் பாராவை வைத்துக்கொள்வதா எடுப்பதா என்ற கேள்விக்கு விடை கிடைக்கவில்லை. எடுத்துவிட்டால் எதை எடுத்தேன் என்று பின்னாளில் மறந்துபோகும். இருந்தாலாவது இதை எடுத்திருக்கலாம் என்று தோன்றும் என்பதால் அப்படியே விட்டுவிட்டேன். ஆதலால் அதை அகவிதையின் அங்கமாகக் கருதுவதும் கருதாததும் உங்கள் விருப்பம். நன்றி.

கல்

2006-12-28T14:40:00.000-05:00

கலகலப்பான படித்துறைகளில்
அறையப்படும் ஆடைகள்
நுரை தள்ளுகின்றன
கரங்கள் நீரை விளாவ
கண்களின் நோட்டம்

கலங்கியிருக்கிறது நீர்

ஆற்றின் நடுவே மேடுதட்டி
சூரியனிடம் பேசுகிறது மணல்
அவ்வப்போது கடந்துசெல்லும்
வெங்காயத் தாமரைக் கூட்டமும்
கிழிந்த ஆடைகளும்
அக்கரையில் மசமசப்பாக
மக்கள் கூட்டம்
கானல்நீரின் பின்புறம்
காட்சி நெளிகிறது

கால்களை முத்தமிடும்
மீன்கள்
மேலிருந்து சொருக்கடிக்கும்
பையன்கள்
துண்டை விரித்து மீன்பிடிக்கும்
சிறுமிகள்
கொக்குகள் போட்ட
மீன்கூடுகளைக் கொத்தும்
காகங்கள்
மணற் குழிகளில்
வெந்நீரில் தவிக்கும்
மீன்குஞ்சுகள்

எல்லா இயக்கங்களையும்
பார்த்துக்கொண்டு அமைதியாக
நீரைக்கிழித்து நிற்கிறது
துருத்திக்கொண்டிருக்கும்
அந்தக் கல்!

ரேடியோவும் கொடிக்காப்புளியும்

2006-12-26T15:42:00.000-05:00

'ஒக்கிட்டாச்சா இதையும்?' என்றார் அப்பா
அலங்கோலமாக தரையில் கிடந்தது
ட்ரான்ஸிஸ்டர்
கரிக்கட்டையைப் பிடித்ததில்
கருமையான உள்ளங்கை
செத்த எவரெடி பேட்டரிக் கட்டைகள்
தரையில் உருண்டு அவர்
கால்களிடம் சென்றன

இலங்கை வானொலியில்
பாடல்கள் ஓடிக்கொண்டிருக்கும்
இந்நேரம் - இங்கிட்டு
சரோஜ் நாராயண்சுவாமி
செய்தி வாசித்துக்கொண்டிருப்பார்

பேட்டரியை எத்திவிட்டு
சுருட்டி வைத்திருந்த
செய்தித்தாளை எறிந்துவிட்டு
வெளியேறினார் அப்பா
பக்கத்து வீட்டில் செய்திகள்
ஒலித்துக் கொண்டிருந்தது

ட்வைன் நூலில் கட்டிய
முள்ளை இடதோரத்திற்கு நகர்த்த
புரியாத ஒலிகள்
அவ்வப்போது கிளம்பின
இன்னும் திருகி நூலை
அக்க வேண்டுமென்று
எழுந்த ஆவலை அடக்கினேன்

அப்பா இல்லையா என்று
வாசலில் நின்றார் சம்முவம் அண்ணாச்சி
பின்னால் கூடையுடன் தயிர்க்காரி
'போன மாசம் பாக்கீ' என்றாள் சன்னமாக
பலசரக்குக் கடையிலிருந்து
சாயங்காலம் ஆளனுப்புவார்கள்
பள்ளிக்கூட பீஸ் இன்னும் கட்டவில்லை
எதிரே ரஜினி போஸ்டரில் சிரிக்க
'இன்றே இப்படம் கடைசி' இளிக்க
அய்யோ அதுக்குள்ளயா என்று
பகீரென்றது

மறுபடியும் சுவிட்சைப் போட
செய்திகள் விட்டுவிட்டு வந்தது
பத்து மணிக்கு கரெண்ட் மாற்றுவார்கள்
விளக்கு போவதற்குள் ரேடியோவை
அலமாரியில் நிற்கவைக்க வேண்டும்
அப்படியே அசங்காது ரேடியோவை அள்ளி
அலமாரியில் வைத்துத் தலையில் தட்ட
செய்திகள் சீராக வாசிக்கப்பட்டன

அப்பா வந்தார் கையில் பையுடன்
ரேடியோவை எடுத்துக்கொண்டு வெளியேறினார்
மறுநாள் தயிர்க்காரி வரவில்லை
மறுநாளும் செய்திகள் வாசிக்கப்படவில்லை
எதிரே ரஜினி வேறுபடத்திற்காக
சிரித்துக் கொண்டிருந்தார்

நாளைக்கு பள்ளிக்கோடம் போம்போது
ராமகிருஷ்ண வாத்தியார்
முட்டி போடச் சொல்லி அடிப்பார்
செக்கூரிட்டியிடம் சொல்லி
கேட்டுக்கு வெளியே நிறுத்துவார்
காம்பவுண்டு அருகில்
செவப்புக் கொடிக்காப்புளி விற்பார்கள்

சாக்கை விரித்து பலகையைத் தலைக்கு
முட்டுக்கொடுத்துப் படுக்க
சராய் பையில் தாத்தா கொடுத்த
அஞ்சு பைசா உறுத்த
சந்தோஷமாக இருந்தது
கொடிக்காப்புளி நினைப்பில்
கடைவாயில் புளித்தது

***

எனையறியாமல்

2006-06-29T18:02:00.000-04:00

அறியாமையில்
எனையறியாமல் இமைப்பதற்குள்
நடந்து முடிந்துவிடுகின்றன
சில தவறுகள்

அழைப்பொலி கேட்டுச் சட்டென
எழுந்து போகையில்
படுத்திருந்த தந்தையின்
காலில் இடறியதும்

எதன் மீதோ இருந்த கோபத்தை
கால்களையணைத்த
குழந்தையிடம் காட்டியதும்

தடுக்கி நகம் பெயர்ந்து அலற
பதறிப் போய்
பொறுத்துச் செல் என்ற
தாயிடம் சிடுசிடுத்துப் போனதும்

தெரியாமல் காலை மிதித்துவிட்ட
கன்றுக் குட்டியின்
முதுகில் அடித்ததும்

இரவில் அழுத்தி மூடிய
கதவிடுக்கில்
பல்லி நசுங்கிப் போனதும்

குறிபார்த்து எறிந்த கல்லில்
கிளையிலிருந்து
விழுந்து மரித்த ஓணானும்
நொண்டி ஓடிய நாயும்

வாலில் கட்டிய நூலைச் சுமந்து
ஊனமடைந்த தட்டானும்

நினைவில் வந்து கொல்கின்றன

அதோடு
சற்று முன் சுவருக்கு அடித்த
சுண்ணத்தில்
சிலையாய்ப் போன
எறும்பும் கூட.

***

* தட்டான் *

2005-12-17T21:50:00.000-05:00

இறக்கைகளின் இயக்கத்தைப்
பார்க்க முடியாத வேகம்
ஊகிக்க முடியாமல்
சட்டென திரும்பி
மாறும் வழித்தடம்
ரகசியமாய்ப் பின்தொடர்ந்து
கரும்பச்சையில் நீண்டிருக்கும்
வால்பிடித்துத் தூக்குகையில்
விரலை வளைந்து
கவ்வும் சினம்
நூல்கட்டி காற்றில்லாமலும்
பறக்கும் தட்டான் பட்டம்

சிறகுகள் போல்
மென்மையான இவள்
ஊகிக்கமுடியாத தருணங்களில்
சட்டெனக் கண்சிமிட்டிப்
போகிறாள் நூல்போன்ற
என் காதலில் கட்டுண்டு
இச்சிறிய தட்டான் போல்

***

நன்றி. மரத்தடி.காம்

* என்னால் ஏன் அழ முடியவில்லை? *

2005-12-17T21:44:00.000-05:00

தரைபார்த்து நீ நடந்த அன்று
எனைப் பார்த்துச் சிரித்தனவுன்
பாதங்கள்

பின்கழுத்துப் பூனைமயிர் வருட
பூச்சாரலில் மும்முடிச்சிட்ட
கணங்கள்

அக்னியை வலம்வந்து அன்றிரவில்
நம்முள் அக்னியால் எழுந்தடங்கிய
வியர்வை

அயர்வுடன் தூங்கிய பல இரவுகள்
அதைத் தொடர்ந்த பகல்
சொர்க்கங்கள்

உன் வயிற்றில் எழும்பித் தணிந்த
உயிரை மென்மையாக முத்தமிட்டதொரு
பொழுது

வலியென்று நீ சொன்ன போது
வாசலில் பதைபதைத்துக் காத்திருந்த
காலம்

'ங்கா'வெனக் காற்றிலலைந்து வந்து
ஆனந்தக் கண்ணீர் தந்த
மழலையொலி

உன்னுயிரைத் தந்து சென்றாய் நீ
எனக் கேட்டதும் மரித்த
என்னிதயம்

வாடிய மலர்க் கன்னத்தை உதடுகளின்
ஈரத்தால் உயிர்ப்பிக்கச் செய்த
முயற்சி

மறுபடியும் கண்திறவாதெனும் உண்மையை
நம்ப மறுத்துத் துடித்த
மனம்

நாவெழுந்து மேலண்ணத்திலொட்ட
செவிமடல்களில் உணர்ந்த
சூடு

தாடை கோணிக்கொள்ள உள்ளிழுத்த
தாங்கவொண்ணா உள்நாக்கின்
வலி

இன்னும் எதற்கு என்று விரக்தியுடன்
வேண்டாவெறுப்பாய் விடும்
மூச்சு

வாழ்க்கையின் விளிம்பில் நின்றுகொண்டு
வெறித்துச் சூனியத்திலுன்னைத்
தேடுகிறேன்

இன்னும் என்னைப் பார்த்துக் கேட்கிறார்கள்
என்னால் ஏன் அழ முடியவில்லை -
என்று.

***

நன்றி : மரத்தடி.காம்

* குளவி *

2005-12-07T12:22:00.001-05:00

* குளவி *

காலையில்தான் கவனித்தேன்
வாசல் நிலைப்படியில் கூடு
ஒற்றை இருள் துளையில்
சலனங்களேதும் இல்லை

அந்திப்பொழுதில் திண்ணையில்
மங்கி எரிகிறது விளக்கு
புத்தகம் விரித்தமர்ந்ததும்
காதில் ஒலித்தது அதன் ரீங்காரம்

லேசான ஸ்பரிசத்தில் சிலிர்த்துத்
தலையுலுக்கிப் பார்க்கக் காற்றினில்
மிதந்தந்தக் குளவி

ஜிலீரென்றது அடிவயிறு
மயிர்க்கால்கள் குத்திட்டு நிற்க
நிதானம் தவறியது மனது
குதித்தெழுந்து விலகிப்
புத்தகத்தை வீசியதும் சட்டென
விலகிப் பறந்து முகத்தருகே
ரீங்கரித்தது குளவி

வீழ்த்தச் செய்த முயற்சிகள்
தோல்வியில் முடிய
தலை குனிந்து விலகி
ஓடினேன் வீட்டினுள்
கதவருகே ஒழுங்கற்ற
காற்றுப் பாதையில் சிறகடித்து
ரீங்கரித்தது குளவி

கம்பியொன்றுடன் திரும்பிடக்
கதவருகில் காற்று மட்டும்
தயங்கி வீசியது
நிலைப்படியை நெருங்கிச்
சுரண்டியதில் தேய்ந்து
வீழ்ந்தது சலனங்களற்ற
அந்தக் கூடு

பிரச்சினை தீர்ந்ததென்றாலும்
மனதில் சலனங்கள்
தலைக்குப்பின் கைகோர்த்து
திண்ணையில் மல்லாந்திட
விளக்கிலிருந்து கசிந்து வழிந்த
மஞ்சள் ஒளி ஊசியாய்
என்னுள் ஊடுருவி
உள்மனதைக் குத்தியது

புத்தகம் முகம் மூடிட
நித்திரை என்னைத் தழுவ
முனைந்த நொடியில் காதில்
ஒலித்தது அந்த ரீங்காரம்

***

பட்டம்

2005-11-28T17:31:00.000-05:00

சுட்டெரித்த வெயிலில்
பொருக்குத் தட்டிய
வேப்பமரப் பிசின்
இசைந்து வந்து
பட்டம் செய்திடப்
பசையாயிற்று

துப்புரவு முடித்து
மூலையில் உறங்கிய
துடைப்பத்தின் கூந்தலில்
இரண்டை
என்றோ படித்து மறந்த
தலைப்புச் செய்திக்
காகிதச் சதுரத்தில்
வில்லாக வளைத்து
நூல் நாணேற்றி
அம்பொன்று வைத்துக் கட்ட
உருப்பெற்றது பட்டம்
மாவட்டச் செய்திகள்
வாலாக நீண்டதும்
பறந்திடத் துடித்துப்
படபடத்தது பட்டம்

மூக்கணாங்கயிறிட்ட காளையாய்
நூற்கண்டில் அடக்கிக் கட்டி
மொட்டைமாடித் தரைச் சூட்டில்
புகைப்போக்கியருகே நின்று
கட்டுப்பாடுள்ள சுதந்திரத்துடன்
ஆகாயவெளியில் நடனமாட
நூல் விடுவித்து அனுமதித்ததும்
சந்தோஷமாகத் தலையாட்டிப்
பறந்தது பட்டம்

சற்றுமுன்புவரை அடங்காது
திரிந்த காற்று
நளினமாக எழுந்த
தேவதைகளைப் பார்த்ததும்
சீராக வீசி இன்னும்
உயர்த்துகிறது

இரட்டை வால்களுடன்
படமெடுத்த பாம்புகளாய்
சில பட்டங்கள் ஆங்காங்கே
ஆவேசமாய் தலையாட்டுகின்றன

இடிக்க வரும்
அவ்விடலைப் பட்டங்களிடமிருந்து
நாசூக்காய் விலகித்
தற்காத்துக் கொள்கிறது
என் பட்டம்

அந்தி சூழ பின்புலத்தில்
மறைகிறது செஞ்சூரியன்

தூரத்தில் வரிசையாக
ஒற்றையாக இரட்டையாக
கீதமிசைத்துக்கொண்டு
பறந்து செல்கின்றன
நூற்கண்டுகளில்லா
சுதந்திரப் பறவைகள்

பனிப்போர்வை கவியுமுன்
போதும் விளையாடியதென
நூலிழுத்துச் சுருட்டிக்
கைகளில் தாங்கிப் பார்க்கையில்
களைப்பற்ற கன்னங்களில்
பனியின் ஈரம் கண்ணீராய்

சிந்தனை மேலேற
படியிறங்கிப் போகையில்
விழியோரம் நிழலாக
வேப்ப மரக்கிளையில்
ஊசலாடியது அந்த
இரட்டைவால் பட்டம்

***

அக்கடிகாரம்

2005-11-28T13:36:00.000-05:00

தேக்கின் பளபளப்பும் கம்பீரமும்
இன்னும் போகவில்லை
நிகழ்வுகளைக் கவனித்துக் கொண்டு
ஓயாத பெண்டுல இயக்கத்துடனும்
சீராகச் சுற்றும் முட்களுடனும்
சுவரில் நிசப்தமாக வீற்றிருக்கிறது
அப்பெரிய கடிகாரம்
எத்தனை நிகழ்வுகள்!

சிறுவயதில் என்னுயரத்தையளக்க
அவ்வப்போது அதை நெருங்கி நின்று
கிழித்த கோடுகள் கால ரேகைகளாக
அப்படியே இருக்கின்றன

அது இருக்கும் பிரக்ஞையின்றி
மாச்சரியங்களுக்குள் உளைந்து
வளைய வந்து கொண்டிருந்தவர்களை
அமைதியாகக் கவனித்தது
இத்தனை காலமும்

முட்களையும் அவை காட்டிய
மணித்துளிகளையும் மட்டும்
உள்வாங்கிக்கொண்டு
அவசரமாகக் கடந்து செல்கையில்
ஒரு வினாடி நின்று - அதன்
பெண்டுலத்தில் தெரியும் என்
பிம்பத்தைப் பார்த்துவிட்டு
நகர்ந்திருக்கிறேன்

அசையும் பெண்டுலத்தில்
அசையாது தெரியும் பிம்பங்கள்

உறங்கும் உலகை இரவுகளிலும்
விழிப்புடன் கவனித்த
அக்கடிகாரம்
மன விகாரங்களையும்
உற்று நோக்குகிறதோவென்று
சந்தேகித்திருக்கிறேன்

நேற்றைய நள்ளிரவில்
வீணை நாதம் போன்று
அடிவயிற்றிலிருந்து
அது எழுப்பிய ஓசையை
இறுதியாக
நினைவிலிருந்து உறக்கத்தில் விழும்
அந்தக் கணங்களில் கேட்டேன்

காலையில் நான் விழிப்பது
அனிச்சையென நினைத்தாலும்
காற்றில் வந்து கண்ணிமைகளைத்
திறக்குமதன் மணிச்சத்தமும்
ஒரு காரணம் என்பதை
ஆழ்மனம் அறிந்தேயிருந்தது

களைத்த கரங்களைப் போல
ஆறரையில் முட்கள் துவள
பெண்டுலம் அமைதியாக நிற்கிறது
என் பிம்பத்தைப்
பிரதிபலித்துக் கொண்டு
கூடத்தில் கிடத்தியிருக்கும்
தாத்தாவின் சடலமும்
ஓரத்தில் தெரிகிறது

இரு மரணங்கள் நிகழ்ந்திருக்கின்றன
அக்கடிகாரம்
கவனியாததொரு கணத்தில்

***

யுத்தம்

2005-10-31T12:20:00.000-05:00

யுத்தம்

அய்யோ போர் துவங்கிவிட்டது
நேற்றிரவு கதவருகில் நிற்கையில்
கண்கூசச் செய்யும் ஒளியுடன்
தெருவில் வெடித்தது முதல் குண்டு

இடிஇடித்தது போல் வெடிச்சத்தம்
எங்கெங்கும் வியாபித்திருக்கும் புகை
காற்றில் வெடிமருந்து நெடி
மூச்சை முட்டச் செய்கிறது

வெளியே தலைகாட்ட முடியாது
வெருண்டு நடுங்கி
கண்மூடிப் படுத்திருக்கிறேன்
ஒவ்வொரு வெடிச் சத்தத்திற்கும்
உடல் தூக்கிப் போடுகிறது

இதுநாள் வரை புன்னகை பூத்தவர்கள்
எதிரிகளாகி விட்டார்கள்
தீச்சுவாலைகளுக்கிடையில்
எகத்தாளமிட்டுச் சிரிக்கிறார்கள்

என் நண்பர்கள் யாவரையும்
காண முடியவில்லை
யாருக்கும் எதுவும் நேர்ந்திராது
என்றெண்ணி ஆறுதல் படுகிறேன்

அதோ அனுபவமிக்க என் ஆசான்
தெருவில் ஓரமாக உயிரைக் காக்க
ஓடுகிறார் வெடிச்சிதறல்களுக்கிடையில்
துரத்துகிறது கூட்டம்
கடவுளே அவரைக் காப்பாற்று

எத்தனை இழப்பென்று தெரியவில்லை
இதோ பின்னிரவில் போர் ஓய்ந்தாலும்
ஆங்காங்கே இன்னும் கேட்கிறது
வெடிச் சத்தம்

தெருவில் மயான அமைதி
சண்டையிட்டுக் களைத்து
உண்டுவிட்டு உறங்குகிறார்கள் போலும்
இன்னும் விழித்திருக்க
என்னால் இயலவில்லை
கண்ணயர்ந்து போகிறேன்
நாளை நன்னாளாக விடியட்டும்

*

"அம்மா இங்க பாரு
தீவாளி முடிஞ்சி ரெண்டு நாளாச்சி
டைகர் வெளிலயே வரமாட்டேங்குது
அடம் பிடிக்குது
என்னன்னு கேளு..."

***

image courtesy : bbc.co.uk

முகம்

2005-10-26T12:12:00.000-04:00

உன்னுள்
இருள் சூழ்ந்திருப்பினும்
எப்போதும் மற்றவர்க்கு - உன்
வெளிச்சப் பக்கத்தை
மட்டும் காட்டு

கற்றுக் கொள் -
நிலவைப் பார்த்தாவது.

சலனமற்ற பயணம்

2005-10-20T19:56:00.000-04:00

அரிதான சலனங்களுடன்
ஆங்காங்கே அமர்ந்திருக்கும்
மனிதர்கள்

மேகத்தின் மயிர்கற்றை போல்
மெல்லியதாயெழும்
புகைக் கோடு

வாய் மூடியிருக்கும் கைகளையும்
ஆடை நுனிகளையுமூடுருவி
அரைக் குரலில் பரிமாறும்
ஆதங்கங்கள்

கொதித்து வழியும் பாத்திரமாய்
சிவந்து தளும்புகின்ற கண்கள்
வெடித்திடத் துடிக்குமென் நெஞ்சம்
மனதுக்குள்ளே ஊழித்
தாண்டவமாடும் உன்னத
தருணங்கள்

கேட்டதையும் பார்ப்பதையும்
நம்ப மறுத்து
பிம்பங்களில் கரைந்து போகத்
துடிக்குமெந்தன் உள்ளம்

காலத்தைப் பின் தள்ளி அவனை
எழுப்பிட முடியாதாவென
ஏங்குமென் இதயம்

தரையில் அசைவின்றிக்
கண் மூடியவன் படுத்திருக்க
சுற்றிலும் புரியாத
அரவங்கள்

காற்றிலிருந்து உதித்ததைப்
போலவே அதில் திரும்பக்
கலந்து போகக் காத்திருக்கிறான்
என்னவன்

தூரத்தில் இருந்து நோக்கி
மகிழ்வுடன் தலையாட்டிக்
கொண்டிருக்கையில்
சட்டெனப் பறந்தோடியது
நூலறுந்த பட்டம்

ஆர்வத்துடன் அனைவரும்
விளையாடிக் கொண்டிருந்த
ஆட்டத்தை
முட்புதரில் தொலைந்து போய்
முடித்து வைத்தது அதுவரை
துள்ளிய பந்து

இயக்கங்கள் நின்ற அத்தருணங்கள்
இதுவரை என்னில்
ஏமாற்றத்தைத் தான்
தந்திருக்கின்றன - ஆனால்
இவனியக்கம் நின்ற நொடியிலிருந்து
என் இயக்கத்தை வெறுத்து
நின்று போகத் துடிக்கிறேன்

மனவுலகிலிருந்து என்னைப்
புறவுலகிற்கு இழுக்கின்றன
காலம் புண்ணாற்றுமெனும்
ஆறுதல் வார்த்தைகள்

நானிருக்கிறேன் என்றவன்
பேசாது கிடக்க
நாங்களிருக்கிறோம் எனச்
சுற்றிப் பரவும் வாக்குறுதிகள்

வெவ்வெறு திசைகளிலிருந்து
பயணத்தைத் தொடங்கிய
நாங்கள்
கை கோர்த்த புள்ளி
பார்வையிலிருந்து மறையுமுன்
சேர்ந்து வரையத் தொடங்கிய
கோலம் முற்றுப் பெறவில்லை
தன் கையை விலக்கிக் கொண்டு
நின்றுவிட்டான்

தாயான ஆயாசம் நீங்குமுன்னே
குழந்தைக்குத் தந்தையாகவும்
இருக்க வேண்டிய நிர்ப்பந்தம்

நாளைய கேள்விகளும்
நிச்சயமற்ற எதிர்காலமும்
நடுக்கத்தைத் தருகின்றன

அழியாத நினைவுகளையும்
அன்பான நிகழ்வுகளையும்
ஆரத் தழுவித் தந்த அன்பினையும்
அதில் பூத்த இப்பூக்குட்டி
மழலையையும் நினைத்துக் கொண்டு

பழுதாகி நின்ற என்னுயிரை
விட்டுவிட்டுச்
செல்லுமிடம் தெரியாமல்
ஓடிக் கொண்டிருக்கும்
வாழ்க்கை ஊர்திக்குள்
அமர்ந்து தொடருகிறேன்

சலனமற்ற இப்பயணத்தை.

***

ஒற்றை இறகு

2005-04-26T11:30:00.000-04:00

ஆலமர நிழலின் சில்லிப்பில்
ஆனந்தமாய் கண்மூடிக்
கண்டதொரு கனவு

*
படபடத்துப் பறந்த காலங்கள்
மரக்குடில்களில்
கூட்டங் கூட்டமாய்
இரவிலும் கத்திக் கும்மாளமிட்ட
நாள்கள்

அதீத உணவு கிட்டிய மமதையில்
அரையரையாய்
கடித்து வைத்த பழங்கள்
மரப்பட்டைகளில் கூர்தீட்டிய
செவ்வலகின்
பளபளப்புப் பச்சை
முகத்தில் மின்னிய
கருமுத்து விழிகள்
*

விரல் சொடுக்கின் சத்தத்தில்
திடுக்கிட்டு விழித்ததும்
முகத்தில் அறையும்
நிஜம்

பிடிக்கப்பட்டு இறகொடிக்கப்பட்டு
இச்சிறு சிறையில்
படபடத்துப் பறக்கத் தவித்து
சிறுகுடுவையில் தண்ணீரும்
பிச்சையிட்ட எச்சில்பழமும்
தின்னும் பரிதாபம்
*

தற்காலிக விடுதலையில்
வெளிவந்து
முன் அடுக்கிய அட்டைக் குவியலில்
ஒன்றைக் கொத்திக்
கொடுத்ததும் கிடைக்கும்
தானியக் கூலி
*

மறுபடி கூடு திரும்பிப்
பெருமூச்சுடன்
சோகை விழிகளை மூடி யோசிக்கையில்
காலடியில் நிரடுகிறது
அதன்...

ஒற்றை இறகு!

***

ஒரு வழியாய்

2005-04-26T07:04:00.000-04:00

மடிந்த ஈசல்களின் சிறகுக் குவியல்கள்
தெருநீரில் கவிழ்ந்த காகிதக் கப்பல்
சந்தேகத்துடன் அலையும் ஒற்றைத் தட்டான்
கோபுரச் சிற்பஙகளிடையில் ஒடுங்கிய புறாக்கள்

லேசாய் சேலை தூக்கி
நீர் சிதறாது நடக்கும் பெண்கள்
மழையின் விசைக்கு மயங்கி
நாணத்துடன் தலைகவிழும் மலர்கள்

மரக்கிளையில் கிழிந்திருக்கும் பட்டம்
உடலைச் சிலிர்த்துதறும் நாய்
மினுக்கிக் கொண்டிருக்கும் தெருவிளக்கு
பறக்க யோசிக்கும் மின்கம்பிக் காகம்

தரைச்சக்கரமாய்ச் சுருண்ட ரயில்பூச்சி
கூரையிலிருந்து சோகையாய் நீர்க்கோடுகள்
வாசலில் மண்ணொட்டிய காலணிகள்
காற்றில் மல்லாந்திருக்கும் குடை

வீட்டினுள் சிக்காது பறக்கும் வெளவால்
கொல்லைப்புற உரலில் தேங்கிய நீர்
கொடியில் தொங்கும் ஈர ஆடைகள்
உள்ளங்கால்களில் புல்தரைச் சில்லிப்பு
நரைக்கத் தொடங்கிய கருமேகங்கள்

ஒரு வழியாய் மழை விட்டிருக்கிறது.

***

'கீச்..கீச்..'

2005-04-21T06:39:00.000-04:00

'டப்'-பென்ற சத்தத்தில் நித்திரை கலைந்தது
உப்புத்தூள் சிதறிய சமையலறைத் தரையில்
இரத்தத் துளிகளுடன் அசைந்து நின்றது வால்
மூடிய பத்தாயத்தினுள் பளபளக்கும் கண்களில்
மரணபயத்துடன் உடல் குறுக்கிய எலிகள்
கம்பியிலின்னும் ஆடுகிறது துண்டு வடை

இடைவெளியில் துருத்திய இளமூக்கு நுனிகளை
மெல்லத் தொடச் சட்டென உள்ளோடி மறைந்தன
சிறு எலிகளின் 'கீச் கீச்' இடைவிடாது கேட்க
தீர்ந்தது பிரச்சினை என்று மகிழ்ந்தது மனம்

பிடிதூக்கிப் பார்க்கவுள்ளே அலைபாய்ந்தன எலிகள்
சடுதியில் குரங்கானது மனம்-கவிழ்த்ததை உலுக்கியதில்
உருண்டு விழும் சத்தம் 'கீச் கீச்' என்ற கூக்குரல்கள்
பிடித்துச் சுற்றியது கைஎதிர் காற்றில் முட்டியது மூச்சு

வாய்க்காலில் முடியும் கொல்லைப்புற ஒற்றையடிப் பாதை
வழியெங்கும் அபயக்குரல் ஆவலுடன் உச்சிமரக் குரங்குகள்

ஆடையை முழங்கால் மேலேற்றிக் கட்டின கைகள்
நீரைப் பார்த்ததும் எலிகள் எழுப்பின 'கீச் கீச்' சத்தம்

கவனமாய் இறங்கும் பாதம் நீர்பட்டதும் சிலிர்க்குமயிர்க்கால்கள்
கலங்கி நீரோடத் தோப்பில் தென்னங்கீற்றின் சரசரப்புச் சத்தம்
எதிர்கரையில் நீந்தி மறையும் வெளிர்மஞ்சள் நீள்பாம்பு
ஒரு கணம் ஓடிச்சிதறிப் பின் காலடியில் கூடுமீன் கூட்டம்

ஓரடி நீரில் குனிந்தமிழ்த்த மெதுவாய் மூழ்கியது பத்தாயம்
அடிப்பரப்பை நீர் தொட்டதும் எழுந்தது ஆரவாரம்
பரபரப்புச் சத்தங்கள் தேய்ந்து முழுதும் மூழ்கியதும் அமைதி

கையைச் சுற்றியெழும்பிச் சிதறும் காற்றுக் குமிழிகள்
இறுகிய கைப்பிடியில் துடிக்கும் உயிர்களின் அதிர்வுகள்
லேசாய் மூச்சு முட்டச் சட்டெனத் தூக்கிப் பார்த்தேன்.

வழிந்தோடும் நீரில் நனைந்து வாய்திறந்து வாழும் ஆசையில்
அவசர மூச்சிழுத்து நடுங்கி இறைஞ்சும் அவற்றின் விழிகள்

அரிசிப் பானைக் குடித்தனமும் நடுநிசியில் பாத்திரமுருட்டியதும் பத்திரப்படுத்திய பட்சணங்களைப் பாதி தின்று வைத்ததும்
திறந்திருந்த பால் குடுவையில் வாய் வைத்தோடிப் போனதும்
எங்கும் புழுக்கையிட்டு அலங்கோலப்படுத்தியதும் நினைவிலாட

சிலவினாடிகள் தயக்கத்திற்குப்பின் சட்டென்று இறங்கியது கை
கண்களும் மனமும் அழுந்த மூட ஆட்டங்களடங்கக் காத்தது கை

எங்கோ மட்டை விழும் சத்தம் எருதொன்று அம்மாவென அலற
கொலைச் செயலைக் கரைந்தறிவிக்கும் சிறகு துடிக்கும் காகம்

வயிறூதிக் கண்திறந்து தூங்கும் எலிகளின் பார்வையைத் தவிர்த்துக் கரையேறிப் புதரில் உதறி ஈரக் காலடிகளுடன் இல்லமடைந்து
அரை வடை மாட்டிப் பத்தாயத்தை மறுபடியும் இருத்திப் போகத் திரும்புகையில் கேட்கிறது மெலிதாய் அரையிருட்டில் 'கீச் கீச்'.

விளக்கு வெளிச்சத்தில் கண்தேட மூலையில்
கண்மூடி மெதுவாய் தவழ்கின்றன
ரோஜா நிற எலிக்குட்டிகள்
கண்மணிகள் கருப்புப் பொட்டாய்
திரும்புகையில் பார்த்துக்கொண்டேன்
கிண்ணத்திலூற்றிய பாலையும்
ரோஜா நிற எலிக்குட்டிகளையும்.

'டப்'-பென்ற சத்தத்தில் நித்திரை கலைந்தது
உப்புத்தூள் சிதறிய சமையலறைத் தரையில்
மூடியிருக்கும் பத்தாயத்தில் அசைவு
மெதுவாய்த் திறந்துவிட விடுதலையை நம்பாமல்
அரைவினாடி தாமதித்து ஆர்ப்பரித்து ஓடின

வடையகற்றிக் கொக்கி விடுத்து வெற்றுப் பத்தாயத்தைச் சேந்தியிலெறிந்தேன் திரும்புகையில் பார்த்துக்கொண்டேன் கிண்ணத்திலூற்றிய பாலையும்
ரோஜா நிறக் குட்டிகளையும்.

'கீச்..கீச்..'

***

நன்றி : மரத்தடி.காம்

* கிணறு *

2005-04-20T07:10:00.000-04:00

வேம்புச் சுள்ளிகளும் இலைகளும்
ஊறிக் கசந்த கிணற்று நீர்
பாதாளக் கரண்டியிட்டு
முத்தெடுத்த பாத்திரங்கள்

ஈரக்கயிற்றின் மறுமுனையில்
தளும்பிச் சிதறிய வாளி
தாய்க் காவலை மீறி
தவறி விழுந்த காக்கைக்குஞ்சு

இடுப்பளவு இறங்கி நின்று
தூர்வாரிய கோடைக்காலங்கள்
நார்பிரிந்து கை சிவக்க
இறைத்துக் குளித்த நாள்கள்

கைநழுவி நீள்பாம்பாய்
கிணற்றுப் புற்றில் விழுந்த கயிறு
ஆரங்கள் தென்படாது
விரைந்து சுற்றிய இராட்டினம்
எப்போதும் ஈரமாயிருந்த
கிணற்றுக் கைப்பிடிச் சுவர்

எங்குபோயின இவையெல்லாம்?
எப்படித் தொலைந்தன சடுதியில்?

எட்டிப் பார்த்தால் சிலந்திவலை
காணாமல் போன பிம்பங்கள்
இருள் நிரம்பித் தளும்பும் கிணற்றில்
எடுக்கத் தவறிய மின்னும் காசுகள்
புலம்பெயர்ந்தன பறவைக் கூட்டம்
செவி அடைக்கும் நிசப்தம்
வறண்ட பூமியின் கடினம்
வெடித்தத் தோலுடன் பூமித்தாய்
தொலைவில் தெரிகிறது கானல் நீர்

வீட்டின் கதவுகளிலும் ஜன்னல்களிலும்
வேம்பு சிரிக்கிறது கசப்பில்லாமல்!

***

நன்றி : மரத்தடி.காம்

* துயில் *

2005-04-19T11:14:00.000-04:00

உலர்ந்துதிர்ந்த இலைகள்
அசைந்தோடி விரைந்து
சரசரக்கும் சத்தம்.

ஊசியிலை மரவேலியை
ஊடுருவித் தாண்டும்
சில்காற்றின் சங்கீதம்.

கைகளைக் குறுக்காய்
கட்டியெனையணைத்தும்
விலாவைக் குத்தும் குளிர்.

பழகிய நாய்கள்
வாலாட்டிச் செல்ல
விரோதப் பார்வையுடன்
ஆந்தை
கரைந்து விரைகிறது
இரவுக் காகம்.

திறந்திருக்கும்
கம்பிக் கதவுகளில்
தொங்கும் பனித்துளிகள்.

மண்மேடுகளும் சின்னங்களும்
சலசலக்காதிருக்கின்றன
தேவதைக்காகக் காத்திருக்கும்
காவலர்களைப் போல.

தாவி முன் ஓடும்
தந்தை மனம்
தள்ளும் முதுமையை
வெறுக்கிறது
ஆடை உராயத் தடுமாறி
நடந்து மண்டியிட
நின்றாடுகிறது ஊதாப்பூ.
மெலிதாய் வருட
தலையாட்டி காற்றிலாடுகிறது
இச்சிறு ஊதாப்பூ.

அன்பின் வருடல்கள்
தினமும் கொடுத்து நான்
வளர்த்தது இந்தச் சிறுசெடி

பசுமை கேசம்
நிலத்தில் துருத்திப்
பிறந்த கணங்கள் தந்த
பிரசவ சந்தோஷம்

வெண்நீல மொட்டொன்று
உதித்தபோது
சட்டென்று சிந்தியது
கண்ணீர்த் துளிகள்

தனித்திருக்கும்
இவ்வொற்றை ஊதாப்பூ
மலர்ந்து நிற்கிறது
என் கண்முன்னே
நிலவினை மறைத்த
கார்மேகங்கள் நகர்கையில்
கண்சிமிட்டும் வெளிச்சத்தில்

ஈர நிலத்தில்
இப்போது பூத்தாற்போல்
தெரிகிறது அசைந்தாடும்
ஊதாப்பூ

சிறுவிதை
செடியானதைப் போலச்
சிறிய இம்மேடும்
பெரிதான பிரமை
மீளாத் துயிலை
நம்ப மறுக்கும்
மனம்

மண்போர்வையை
மெல்லியதாய் வருடுமென்
நடுங்கும் கைகள்
ஊற்றுப் பெருக்கெடுக்கும்
பாசம் ஈரமண்ணைத்
துளைத்திறங்கும்.

செல்ல மகளின்
முகத்தைத் தொடும்
உயிர் துடிக்கும் என்
ஸ்பரிசம்

தன் மெய்சிலிர்ப்பைக்
காட்டுகிறாள் லேசாய்த்
தலையாட்டும் இச்சிறு
ஊதாப்பூவில்...

***

நன்றி : மரத்தடி.காம்

* என்னுடன் வருவாயா? *

2005-04-19T10:56:00.000-04:00

நான் பூமியில் ஜனித்த நேரம்
நீயும் இருந்ததைப்
பார்க்க முடியவில்லை

ஒருநாள் இருநாளல்ல;
சில மாதங்களுக்கு.

தவழ்ந்த நாளில் பார்த்தாலும்
உன்னை உணரவில்லை நான்

எழுந்து நின்று பார்க்கையில்
சற்று பயமாக இருந்தது
பார்க்காதே என்று
அம்மா அதட்டினாள்!

உன்னை கவனிப்பதை
விட்டுவிட்டேன்
யாரும் உன்னை
கவனிக்கவில்லை-இருந்தாலும்
நீ வளர்ந்தாய் - என்னுடன்

சாலையில் தனித்து நடக்கையில்
என் காலடியில் விழுந்து கிடந்து
என்னை விட்டுச் செல்ல மறுப்பாய்.

குழந்தையாய் ஒட்டிக் கொள்வாய்
சிலசமயம் கோபமுற்று
விஸ்வரூபம் எடுப்பாய்
நான் கண்டுகொள்ளவில்லை

நாம் காதலர்களல்ல
சகோதரர்களல்ல
எவ்வுறவும்
நமக்குள் இல்லை

நானே நீயா என்ற
கேள்வி எழுந்தபோது
'சே.. நீ நல்லவன்' என்றார்கள்
என்னை.

ஆனாலும் சில சந்தர்ப்பங்களில்
நான் செய்யும் செயல்களுக்கு
உன் முகத்தைக்
கட்டிக் கொண்டேன்

வருடங்கள் உருண்டோடிவிட்டன
என்னில் பல மாற்றங்கள் - ஆனாலும்
நீ அப்படியேதான்
இருக்கிறாய்

நடக்கத் தடுமாறிக் கோல்
ஊன்றியபோது என்னில்
பரிதாபப்பட்டோ என்னவோ
நீயும் கோலூன்றிக் கொண்டாய்
எனக்குத் தெரியும்
உனக்கது தேவையில்லை
என்று.

நீ விழுந்துவிட மாட்டாய்.

உனக்கு யாரும் தேவையில்லை
என்னைத் தவிர.
அப்படி என்ன செய்துவிட்டேன்
உனக்கு?
ஏன் என்னைப்
பிடித்துக் கொண்டிருக்கிறாய்?
கேட்கமுடியவில்லை உன்னிடம்
ஏனென்றால்
நீ பதில் சொல்லமாட்டாய்.

இதோ படுக்கையில் நான்
இறுதி நாள்களை எண்ணிக்கொண்டு.
என்னைக் கொண்டு செல்கிறார்கள்
என்னுடன் வருகிறாய்
என்று அறிவேன்.
உன்னைப் பார்க்கத்தான் முடியவில்லை
ஜனித்த நாள்களைப் போல.

இவ்வுலகைவிட்டுச் செல்கிறேன்
சொர்க்கத்திற்கா நரகத்திற்கா?
எங்கேயென்று தெரியவில்லை.
எங்கு நான் சென்றாலும்,
அங்கும் என்னுடன் வருவாயா -

என் நிழலே?

***

நன்றி : மரத்தடி.காம்

* ஸ்டிக்கர் பொட்டுகள்! *

2005-04-19T10:44:00.000-04:00

'பாட்டீ! காசு குடு!'
'எதுக்கடி காசு?'

'பொட்டு வாங்கணும்..
ஸ்டிக்கர் பொட்டு'

'இந்தா காசு..
வெரசா வந்துடு'

காற்றில் விரைந்து
கடைக்குச் சென்று
காசு கொடுத்ததும்
கையில் பொட்டுகள்

ஒன்றா இரண்டா!
ஒரே தாளில்
வரிசைக்கு நாலு!
மூணு வரிசை!

ஸ்டிக்கர் பொட்டுக்கள்!
வட்டப் பொட்டுக்கள்!

ஒன்றைப் பிய்த்து
ஒட்டிக்கொண்டு,
ஒய்யாரச் சிரிப்புடன்
திரும்ப வந்து,

'பாட்டீ' என்றழைத்தேன்!
'கொல்லையில்' என்றாள் அம்மா!

ஈரம் வழுக்காது
ஓடிச் சென்று
தொழுவம் கடந்ததும்
குட்டிச் சுவருக்கப்பால் பாட்டி..

குனிந்து நிமிர்ந்து
வறட்டி தட்டுகிறாள்!
வரிசைக்கு நாலு!
மூணு வரிசை!

ஸ்டிக்கர் பொட்டுகள்!
வட்டப் பொட்டுகள்!!

***

நன்றி : மரத்தடி.காம்

* சங்கமம் *

2005-04-19T10:24:00.000-04:00

நதிகளின் சங்கமத்தில்
நீரது நிறமிழக்கும்
நம்மிந்தச் சங்கமத்தில்,
நம்மை இழந்தோம் - கரைந்தோம்.

நானும் நீயும் ஒன்றாய்
காதுகளடைக்க இப்பேரமைதியில்
உயிர்களின் பூகம்ப அதிர்வை
ஆவி முழுதும் உணர்ந்தோம்.

இச்சையா கிடக்கையா - இல்லை
இரண்டுமே ஒன்றாவென - நாம்
நினைக்கவே நேரமில்லை - நம்
நினைவுகளும் வசமில்லை.

முடிவற்ற இயக்கம் கருதி
உள்வெளி அலைபாயும் காற்று
ஊர் தூங்கும் நடுநிசியில்
உறங்காதிருக்கும் உள்ளங்கள்.

ஆகாயப் பொத்தல்களாய்ச்
சிதறிச் சிரிக்கும் நட்சத்திரங்கள்
கண்மூடிக் கிடந்தாலும் - அவற்றைக்
காண்கிறேன் உன்னுள்ளே

வியர்வை முத்து வருடி
விரல்களால் தலை கோதி
வெம்மூச்சினில் குளிர் விரட்டி
வீழ்த்தினோம் இக்கரி இரவை.

நடுங்கி நெகிழும் அடிவயிறு
நாசி துடிக்க ஸ்வாஸம்
நரம்பு தெறிக்கும் அழுத்தம்
வெடிக்க முயலும் இதயம்.

சில்லிட்டச் செவி மடல்கள்
கனிந்துச் சிவந்த இதழ்கள்
பனித்து உலரும் விழிகள்
பூமயிர் கன்னத்தின் மென்மை.

ஆவிசேர அணைத்து இங்கே
அகிலமும் மறந்திருப்போம் - நம்
உயிர்களின் சங்கமத்தில் - ஒரு
உயிரின் ஜனனம் இன்று.

***

நன்றி : மரத்தடி.காம்